توهینے که همے زوتاں مسیت مکی ءُ مولانا عبدالحمید ءَ بوتگ، سک اێرے جن اێں؛ آمیدگس ءِ کارمستراں گۆں اهانت کنۆک ءَ ترندێں کردے کن انت

سنی‌آنلاین| مولانا عبدالغنی بدری، ماں زاهدان ءِ نمازجمعه ءِ دیوان ءَ (14 دی‌ماه 1403) مۆدگ کنۆکے ءِ توهین ءَ به مسیت مکی ءُ دارالعلوم زاهدان ءَ سک اێر جت ءُ شه آمیدگس ءِ کارمستراں لۆٹ ات که گۆں آ مۆدگ کنۆک ءَ ترندێں کردے کن انت.

په سنی‌آنلاین ءِ سرهال ءَ مولانا عبدالغنی بدری، زاهدان ءِ جمعه ءِ ادارکێں امام ءَ درشان کرت: همے زوتاں ماں چاگردی رسانکدراں تامربندے شنگ بوت ات که یک مۆدگ کنۆکے که ابید شه زاهءُزکت ءُ بدوگوشی ءَ دگه چیزے نه زانت، مسیت مکی ءُ شیخ‌الاسلام مولانا عبدالحمید ءِ بدگوشی ءَ را کرتگء.

مولانا عبدالغنی گێش کرت: مئے دین ءِ ته ءَ دگرانی بدگوشی ءُ توهین نه انت. الله پاک ءَ مسلمانانَ گوشتگ که آوانَ که شرک ءِ آماچ انت ءُ ابید شه الله ءَ دگرانَ عبادتَ کن انت، زاهءُزکت مه کن انت. پمێشا که شیخ‌الاسلام مولانا عبدالحمید شه اے منبر ءَ مدام مردمانَ اخلاق ءِ درسَ دنت ءُ اے پاک ءُ مقدسێں منبرے، ما نه لۆٹ اێں که آ بددپێں مۆدگ کنۆک ءِ پسۆ ءَ دےاێں، بلێں بژن انت که کێنگی ئێں مردماں آیی تامربند ءَ ماں چاگردی رسانکدراں شنگ کرتگ.

🔸اگاں پێسر ءَ گۆں مسیت مکی ءِ اهانت کنۆکاں کانودی کردے بوتێں مرۆچی اے توهین پرام نه بوت

زاهدان ءِ جمعه ءِ ادارکێں امام ءَ زۆر پر دات: آ بددپێں مردک ءَ نمازے که مسیت مکی ءَ وانگ بیت، گۆں بدێں چیزے تشبیه کرتگ ات، وهدےکه نماز بندگی ءِ چێدگ ءُ الله ءُ بندگانی رهوت انت.

مولانا بدری گێش کرت: گێش شه پنجاه سال انت که نێکێں بندگاں ماں زاهدان ءِ مسیت مکی ءَ الله ءَ عبادت کن انت، بلے آ مۆدگ کنۆک ءَ مسیت مکی ءَ را «مسیت ضرار» گوشتگ. همے گال ءَ را پێسرتر ءَ دگه همایی همرنگے هم گوشتگ ات؛ اگه آ درگت ءَ گۆں آ مردک ءَ کانود ءِ رد ءَ کرد بوتێں گڑا مرۆچی کسے هێماتَ نه کرت که مسیت مکی ءِ باروا چۆشێں گالاں پرام کنت.

دارالعلوم زاهدان ءِ هێلکاری ءِ معاون ءَ گوشت: شه مسیت مکی ءِ منارهاں اذان ءُ توحید ءِ توار شنگ بیت. اے مناره ءُ اذان ءِ بدگوشی واجه رسول الله صلی‌الله‌علیه‌وسلم  ءِ پاکێں گشتانک ءَ یاد ءَ کار ایت که وهدے اذان ءِ توار چست بیت شیطان شه اے توار ءَ ترس ایت ءُ تر دیان ءَ جه ایت.

🔸مسیت مکی ءُ مولانا عبدالحمید تیوگێں مسلمانانی انت/ مولانا عبدالحمید ءُ مسیت مکی ءِ توهین کنۆکاں «ایران ءِ مردمانی یکویی ءُ همدلی ءَ» سگ ات نه کن انت

مولانا عبدالغنی گوشت: زاهدان ءِ مسیت مکی یک مردمے ءِ نه انت، بلکه تیوگێں سنی ءُ شیعه‌یانی انت. شیخ‌الاسلام مولانا عبدالحمید هم تیوگێں استمان ءِ انت ءُ واجه ءِ دیدانکانی سوب ءَ گێش شه اهل‌سنتاں، شیعه‌‌ئان هم گۆں واجه ءَ مهر کن انت.

مولانا بدری ٹکاٹک گوشت: آوان که مسیت مکی ءُ مولانا عبدالحمید ءِ باروا رڈێں گپ جن انت، چۆناهی ءَ یکویی ءُ همدلی ءَ سگ ات نه کن انت ءُ جتایی ءِ پد ءَ انت. چۆشێں مردمانَ که کارمستراں هم آوانَ زبر درست کن انت، نه بائد میکروفون ءُ تریبون دیگ بیت. مزن‌رهشۆن ءِ گپانی رد ءَ اے «انگریزی ئێں شیعه» انت که مولءُمراد اش مسلمانانی یکویی ءِ پرۆشگ انت.

🔸 شه استان/هلاکه ءِ زبردستێں کارمستراں منتوار اێں که اے توهین ءَ را اێر اش جت

زاهدان ءِ جمعه ءِ ادارکێں امام ءَ گێش کرت: ما شه بازێں پاگواجه ءُ استان ءِ زبردستێں کارمستراں که اے توهین ءَ را اێر اش جت ءُ همےرنگ شه امنیتی ادارهاں که اے باروا شکایت اش کرت، منتوار اێں.

مولانا عبدالغنی بدری وتی هبرانی گڈسر ءَ گوشت: ما اے رڈێں کرد ءُ بدگوشی ءُ بےادبی ءَ سک اێر جن اێں ءُ شه کارمستراں، هاسکار آمیدگس ءِ کارمستراں لۆٹ اێں که اے بن‌گپ ءَ سک رندگیری کن انت ءُ مردمانَ شه برورد ءَ سهی کن انت. گۆں اے بددپێں مردک ءَ ترۆندێں کردے بیت تاں آیۆک ءَ کسے هێمات مه کنت که مردمانی مقدساتانی توهین ءَ کنت.