نئی کابینہ سابقہ حکومت کی کمزوریوں کا ازالہ کرے

اہل سنت ایران کی ممتاز دینی و سماجی شخصیت نے اپنے سات جولائی دوہزار سترہ کے خطبہ جمعہ میں ایران کی گیارہویں حکومت کے خاتمے اور نئی کابینہ کی تشکیل کی جانب اشارہ کرتے ہوئے ’سابقہ کمزوریوں‘ کے ازالے پر زور دیا۔
شیخ الاسلام مولانا عبدالحمید نے خطبہ جمعہ میں کہا: موجودہ حکومت میں جو اپنے آخری دنوں میں ہے، بہت سارے مسائل حل ہوئے۔ لیکن ابھی تک کچھ مسائل باقی ہیں اور عوام کی بعض شکایات اپنی جگہ پر ہیں۔
انہوں نے مزید کہا: ہمیں امید ہے نئی حکومت میں عوام کی شکایات پر توجہ دی جائے گی اور سب کی توقعات پوری ہوں گی۔
اہل سنت ایران کے مطالبات کی طرف اشارہ کرتے ہوئے خطیب اہل سنت زاہدان نے کہا: اہل سنت ایران، جس نے حالیہ انتخابات میں بڑے پیمانے پر شرکت کی، امید رکھتی ہے کہ اس کے اڑتیس سالہ مطالبات میں سے ایک پر خصوصی توجہ دی جائے۔ ہمیں توقع ہے نئی کابینہ میں اہل سنت کے لائق و قابل افراد سے کام لیا جائے اور کابینہ میں سنی وزیر شامل ہوں۔
انہوں نے کہا: ایران کی سنی برادری کا مطالبہ ہے قومی اور صوبائی سطح کے اعلی عہدوں پر ان کے لائق افراد کی صلاحیتوں سے کام لیا جائے۔ یہ اہل سنت ایران کی پرانی توقع اور خواہش ہے۔
ممتاز سنی عالم دین نے مزید کہا: ظاہر سی بات ہے جب ایران کی کابینہ میں اہل سنت شامل ہوں اور قومی و صوبائی سطح پر ان سے کام لیاجائے، اس کے مثبت اثرات علاقائی اور بین الاقوامی سطح کے معاملات پر پڑجائیں گے، خطے میں امن کو تقویت ملے گی اور مسلم ممالک کے درمیان مزید یکجہتی پیدا ہوگی۔

تمام بینک اسلامی بینکنگ کے اصول کا خیال رکھیں
شیخ الاسلام مولانا عبدالحمید نے اپنے خطاب کے ایک حصے میں ’بینک مہر ایران‘ کے مینجنگ ڈائریکٹر کی موجودی اور خطاب کی جانب اشارہ کرتے ہوئے کہا: بینک مہر ایران کے ذمہ داروں کے لیے یہ بڑی کامیابی ہے کہ سود کے بغیر عوام کو قرض الحسنہ کے طورپر قرضے دیتے ہیں۔
انہوں نے مزید کہا: تمام بینکوں کو ہمارا مشورہ ہے کہ اسلامی بینکنگ کے اصول کا تجربہ کریں اور غیرسودی کاروبار کے ضوابط کا خیال رکھیں۔ بلاشبہ اس حوالے سے انہیں اللہ تعالی کی نصرت اور عوام کی حمایت نصیب ہوگی۔ یہ بات تجربے سے ثابت ہوچکی ہے کہ جو بینک سود کے بغیر قرضے دیتے ہیں، دیگر بینکوں سے زیادہ ترقی کرتے ہیں۔