مقبوضہ کشمیر میں قابض بھارتی فوج کی بربریت جاری، مزید 3 کشمیری شہید

مقبوضہ کشمیر میں بھارتی درندگی مسلسل 44 ویں روز بھی جاری ہے اور قابض فوج نے فائرنگ کر کے مزید 3 کشمیریوں کو شہید کردیا ہے۔
کشمیر میڈیا سروس کے مطابق بھارتی فوج نے مقبوضہ کشمیر میں ضلع کپواڑہ کے علاقے تنگہار میں محاصرہ کر کے مزید 3 نوجوانوں کو شہید کردیا جب کہ بھارتی میڈیا کا کہنا ہے کہ یہ تینوں افراد بھارتی کیمپ پر دو روز قبل کئے جانے والے حملے میں ملوث تھے تاہم بھارتی حکام کی جانب سے مزید کوئی معلومات فراہم نہیں کی گئیں۔
ادھر مقبوضہ وادی میں مسلسل 44 ویں روز بھی کرفیو نافذ ہے جس کی وجہ سے کھانے پینے کی اشیا اور ادویات کی شدید قلت پیدا ہو گئی ہے جب کہ وادی میں انٹرنیٹ اور موبائل فون سروس بھی معطل ہے. کرفیو کے باوجود سری نگر سمیت دیگر علاقوں میں شہریوں کی بڑی تعداد نے بھارت کے خلاف احتجاجی مظاہرے کئے اور ریلیاں نکالیں۔ مظاہرین نے ’’کشمیر بنے گا پاکستان‘‘ کے نعرے لگائے اور بھارتی وزیراعظم نریندر مودی اور ریاست کی کٹھ پتلی وزیراعلیٰ محبوبہ مفتی کے پتلے بھی نذر آتش کئے۔
واضح رہے کہ گزشتہ ماہ بھارتی فوج کے ہاتھوں تحریک آزادی کے نوجوان کمانڈر برہان مظفر وانی کی شہادت کے بعد سے مقبوضہ کشمیر میں حالات کشیدہ ہیں اور بھارتی فوج کے ہاتھوں اب تک 90 کشمیری شہید اور ہزاروں زخمی ہو چکے ہیں۔

ایکسپریس نیوز