شمالی کوریا نے تیسرا ایٹمی دھماکا کردیا، سلامتی کونسل کاہنگامی اجلاس طلب

شمالی کوریانےاقوام متحدہ کے خبردارکرنے کے باوجود تیسرا ایٹمی دھماکا کردیا، سلامتی کونسل کاہنگامی اجلاس طلب، جنوبی کوریا اور جاپان کااظہارتشویش۔
شمالی کوریا کی طرف سے یہ تیسرا ایٹمی دھماکا ہے جس کی تصدیق شمالی کوریا کے قومی ٹی وی اور جنوبی کوریا کی وزارت دفاع نے کردی ہے، ترجمان کے مطابق شمالی کوریا نے ایٹمی تجربے کے حوالے سے گزشتہ روز امریکا، چین اور جنوبی کوریا کو آگاہ کردیا تھا۔
امریکی جیولوجیکل سروے رپورٹ میں کہا گیا ہے کہ دھماکے کے نتیجے میں شمالی کوریا کے ایٹمی مرکز کے قریب 4.9 شدت کا زلزلہ ریکارڈ کیا گئی جبکہ ایٹمی دھماکے پر سلامتی کونسل کا ہنگامی اجلاس طلب کر لیا گیا ہے ۔
دوسری طرف عالمی برادری نے ایٹمی دھماکے کی شدید مذمت کی ہے جبکہ شمالی کوریا کے سب سے بڑے اتحادی چین نے بھی اسے ایٹمی دھماکا کرنے سے باز رہنے کو کہا تھا لیکن اس کا بھی کوئی اثر نہ ہوا  تاہم جنوبی کوریا نے اپنی افواج کو ہائی الرٹ پر کردیا ہے جبکہ جاپان نے بھی ایٹمی دھماکے پر شدید تحفظات کا اظہار کیا ہے واضح رہے شمالی کوریا اس سے پہلے 2006 اور 2009 میں بھی ایٹمی دھماکے کر چکا ہے۔

ایکسپریس نیوز