افغانستان میں نیٹو بیس پر حملہ، چھے جیٹ طیارے تباہ

کابل (العربیہ ڈاٹ نیٹ ) جنوبی افغانستان میں نیٹو افواج کے ایک بڑے اڈے پر طالبان کے حملے میں چھے امریکی جہاز تباہ ہو گئے۔

اتوار کی صبح ایساف کے ایک بیان میں بتایا گیا ہے کہ امریکا کے چھے لڑاکا طیارے طالبان حملے میں تباہ ہو گئے۔ جمعہ کی شب طالبان کے اس حملے میں بیس پر کھڑے دو مزید لڑاکا جہازوں کو نقصان بھی پہنچا ہے۔ یاد رہے کہ اسی بیس پر برطانوی ولی عہد کے بیٹے ہیری بھی تعینات ہیں۔

ایساف کے بیان کے مطابق افغانستان کے جنوبی صوبے ہلمند میں واقع باسٹن فوجی اڈے پر طالبان حملے میں بھاری نقصان ہوا ہے۔ حملے میں تین اسٹورز بری طرح تباہ ہوئے جبکہ ہینگرز میں پارک چھے لڑاکا جہازوں کو نقصان پہنچا۔

دوسری جانب نیٹو افواج کا کہنا ہے کہ افغان پولیس کے مشتبہ اہلکار نے جنوبی افغانستان میں بین الاقوامی فوج کے اہلکاروں پر گزشتہ روز فائر کھول دیا، جس کے نتیجے میں دو فوجی ہلاک ہو گئے۔

نیٹو کے زیر انتظام افغانستان میں قیام امن کی ذمہ دار بین الاقوامی فوجی کے دستوں ‘ایساف’ کے مطابق فوجیوں پر فائرنگ کرنے والا افغان پولیس کے اہلکار کو بھی بعد ہلاک کر دیا گیا۔

بعد ازاں برطانوی وزارت دفاع کے ایک بیان میں کہا گیا کہ جنوبی صوبے ہلمند میں دریائے سراج کے قریب افغان پولیس کی وردی میں ملبوس ایک شخص کی فائرنگ سے دو امریکی فوجی مارے گئے۔ مرنے والے فوجیوں کا تعلق یارکشائر کے تھرڈ بریگیڈ سے بتایا جاتا ہے۔

اس حملے میں ہلاک ہونے والے دو فوجیوں سمیت امسال افغان فوجیوں اور پولیس اہلکاروں کے ہاتھوں ہلاک ہونے والے غیر ملکیوں کی تعداد 47 ہو گئی ہے۔ ایساف کے ایک ترجمان نے “اے ایف پی” کو بتایا کہ ہمارے خیال میں حملہ آور شخص مقامی افغان پولیس کا اہلکار تھا تاہم اس بارے میں ہم وثوق سے کچھ نہیں کہ سکتے کہ آیا مارے جانے والے شخص نے افغان فوج کی وردی پہن رکھی تھی؟

اسی ذریعے کے مطابق یہ شخص غیر ملکی فوج کی ایک گشتی پارٹی کے ہمراہ بیس آیا اور اس نے کمپاؤنڈ میں داخلے کی اجازت مانگی۔ انکار پر اس نے فائر کھول دیا۔ ایساف ہی کے مطابق افغان پولیس یا فوج کی غیر ملکی فوج پر فائرنگ میں وہ اہلکار ملوث ہوتے ہیں کہ جو القاعدہ اور طالبان نے کسی نہ کسی طرح افغان سیکیورٹی اداروں میں بھرتی کرا رکھے ہیں اور وہ موقع پاتے ہی اپنا کام دکھا جاتے ہیں۔