کابل: پے در پے دھماکوں میں 6 افراد ہلاک

کابل(ايجنسياں) امریکی صدر باراک اوباما کے دورہ افغانستان کے موقع پر کابل میں پے در پے دھماکے ہوئے ہیں۔ وزارت داخلہ کے مطابق دھماکوں کے نتیجے میں چھ افراد ہلاک ہو گئے۔
افغان پولیس حکام نے بتایا ہے کہ دارالحکومت کابل میں بدھ کو خود کش کار بم دھماکا ہوا ہے لیکن اس میں ہونے والے جانی نقصان کے بارے میں تفصیلات نہیں بتائی گئی ہیں۔
یہ دھماکا امریکی صدر براک اوباما کی کابل سے روانگی کے چند گھنٹوں بعد ہوا، وہ منگل کو رات دیر گئے افغانستان پہنچے تھے اور تقریباً سات گھنٹے قیام کے بعد وہاں سے روانہ ہو گئے۔
اس کے بعد کابل میں غیر ملکیوں کے گیسٹ ہاوس کے قریب خود کش کار بم دھماکا ہوا جس کے نتیجے میں چھ افراد ہلاک ہوگئے۔ واضح رہے کہ امریکی سفارتخانہ کابل شہر کے وسط میں واقع ہے جبکہ جلال آباد روڈ پر فوجی اڈے قائم ہیں۔ افغان طالبان نے دھماکوں کی ذمہ داری قبول کر لی ہے۔
عینی شاہدین کا کہنا ہے کہ انھوں نے دارالحکومت کے مشرق میں ایک اور دھماکے کی آواز بھی سنی جس کے بعد فائرنگ بھی ہوتی رہی۔