نیٹو کے حملے میں افغان پولیس اہلکار ہلاک

كابل(بى بى سى) افغانستان کے دارالحکومت کابل کے جنوبی مغربی علاقے میں بین القوامی فوج کی جانب سے رات کے وقت کیے گئے ایک حملے کے دوران فائرنگ کے تبادلے میں دو افغان پولیس اہلکار ہلاک ہو گئے ہیں۔
افغانستان میں پولیس کے مطابق واقعہ اس وقت پیش آیا جب غزنی صوبے میں پولیس اہلکاروں نے غیر ملکی فوجیوں کو آگے جانے سے روکا۔
نیٹو فوج کے ترجمان کا کہنا ہے کہ انہیں واقعے کا علم ہوا ہے اور اس کی تحقیقات کی جا رہی ہیں۔
افغانستان میں رات کے اوقات میں کی گئی نیٹو کی کارروائیاں ہمیشہ ہی متنازعہ رہیں ہیں۔ بدھ کے روز افغان صدر حامد کرزئی نے کہا تھا کہ امریکی اڈوں کے طویل عرصے تک افغانستان میں قیام کی اجازت سے قبل ایسے حملے روکنا ضروری ہے۔