ایران: گزیک کے خطیب انتقال کرگئے

گزیک (سنی آن لائن) ایران کے صوبہ جنوبی خراسان کے نامور عالم دین مولانا سید عبدالعلی فاضلی طویل علالت کے بعد بدھ یکم اپریل دوہزار بیس انتقال کرگئے، انا للہ و انا الیہ راجعون۔
سنی آن لائن کو موصول ہونے والی اطلاعات کے مطابق، مولانا سید عبدالعلی فاضلی 1940ء کو ضلع درمیان کے شہر گزیک میں پیدا ہوئے۔ مرحوم اسی شہر کے خطیب جمعہ اور ممتاز دینی رہ نما تھے۔
مولانا سید فاضلی نے ابتدائی تعلیم پرائمری تک اپنے آبائی علاقہ میں حاصل کرنے کے بعد دینی تعلیم کے حصول کے لیے افغانستان کے شہر ہرات کا سفر کیا۔ بعدازآں پاکستان جاکر انہوں وقت کے ممتاز علمائے کرام مولانا مفتی محمدشفیع، مفتی محمود، مولانا سلیم اللہ خان اور مولانا عبداللہ درخواستی رحمہم اللہ سے استفادہ کیا۔
مولانا فاضلی نے جامعہ دارالعلوم کراچی سے فراغت حاصل کرنے کے بعد ہندوستان کا رخ کیا جہاں انہوں نے مولانا قاری محمدطیب سمیت دیگر اکابر علما کی شاگردی کا شرف حاصل کیا۔
مرحوم نے علمی پیاس بجھانے کے لیے مصر کا سفر بھی کیا جہاں آپؒ نے جامعۃ الازہر کی ممتاز شخصیات مثلا شیخ شلتوت اور شیخ طنطاوی سے استفادہ کیا۔
مولانا فاضلی سرکاری سکولوں میں عربی زبان کے استاذ ہونے کے ساتھ ساتھ تایباد اور گزیک شہروں میں خطیب بھی مقرر تھے۔