شام : ادلب پر فضائی حملوں میں 8 بچوں سمیت 21 افراد ہلاک

شام کے شمال مغربی صوبے ادلب میں روسی اور شامی لڑاکا طیاروں نے تباہ کن بمباری جاری رکھی ہوئی ہے اور ان کے فضائی حملوں میں آٹھ بچوں سمیت اکیس افراد ہلاک اور متعدد زخمی ہوگئے ہیں۔
برطانیہ میں قائم شامی رصد گاہ برائے انسانی حقوق نے سوموار کو اطلاع دی ہے کہ روسی اور شامی طیارے گذشتہ ایک ہفتے سے جہادیوں اور باغیوں کے زیر قبضہ ادلب کے مختلف علاقوں پر بمباری کررہے ہیں۔
رصدگاہ کے مطابق ادلب کے جنوب مشرق میں واقع قصبے سنجار کے مغرب میں ایک مکان پر بمباری سے ایک ہی خاندان کے گیارہ افراد مارے گئے ہیں۔
رصدگاہ کے سربراہ رامی عبدالرحمان نے فرانسیسی خبررساں ایجنسی اے ایف پی کو بتایا ہے کہ شامی فوج اور روس کے لڑاکا طیاروں نے آج بھی ادلب کے مختلف حصوں میں باغیوں کے ٹھکانوں پر فضائی حملے کیے ہیں۔