ممتاز ترکمن سنی عالم دین انتقال کرگئے

بندرترکمن (سنی آن لائن) ایران کے صوبہ گلستان سے تعلق رکھنے والے ممتاز سنی عالم دین ’حاج آخوند عابدی کر‘ دل کی بیماری کی وجہ سے خالق حقیقی سے جا ملے۔ انا اللہ و انا الیہ راجعون
سنی آن لائن نے مقامی ذرائع کے حوالے سے رپورٹ شائع کی، آخوند عابدی بندرترکمن شہر کے خطیب جمعہ تھے اور ان کا شمار ترکمن صحرا خطے کے مایہ ناز علما میں ہوتا تھا۔
آخوند عابدی کچھ عرصے سے دل کی تکلیف میں مبتلا تھے جس کی وجہ سے انہیں تہران میں ایک اسپتال میں داخل کرایا گیا جہاں ان کا سانحہ ارتحال پیش آیا۔ حاج آخوند عابدی کی عمر 90 سال تھی۔
مرحوم تفسیر قرآن میں مہارت رکھتے تھے اور ترکمنی زبان میں پہلی تفسیر انہوں نے ہی لکھی جو چار جلدوں میں ہے۔
شیخ الاسلام مولانا عبدالحمید سمیت متعدد سنی علمائے کرام نے تعزیتی پیغام شائع کرکے ان کے اہل خانہ، متعلقین اور تلامذہ سے تعزیت کا اظہار کیا ہے۔