اسرائیلی دہشت گردی میں مزید 4 فلسطینی شہید

فلسطین میں اسرائیلی فوج کی ریاستی دہشت گردی کے نتیجے میں جمعرات کے روز مزید چار فلسطینی شہری شہید کردیے گئے ہیں۔
تین فلسطینیوں کو بیت لحم اور ایک کو الخلیل شہر میں گولیوں کا نشانہ بنایا گیا جس کے بعد یکم اکتوبر 2015 ء کے بعد سے جاری تحریک انتفاضہ کے دوران اب تک 149 فلسطینی شہید ہوچکے ہیں۔
مرکزاطلاعات فلسطین کے مطابق جمعرات کو اسرائیلی فوجیوں نے مغربی کنارے کے جنوبی شہر الخلیل کے مشرق میں ‘‘بیت عینون‘‘ قصبے میں ایک فلسطینی نوجوان کو گولیاں ماریں جس کے نتیجے میں اس کی موت واقع ہوگئی۔
اسرائیل کے عبرانی نیوز ویب پورٹل’’ 0404 ‘‘ کی رپورٹ میں بتایا گیا ہے کہ بیت عینون کے بائی پاس روڈ نمبر 60 پر ایک فلسطینی نوجوان نے یہودی فوجیوں پر چاقو سے حملے کی کوشش کی جس پر کمانڈو یونٹ’’گیفاتی‘‘ کے اہلکاروں نے اس پرگولیاں چلا دیں اور وہ موقع ہی دم توڑ گیا۔دوسری جانب فلسطینی وزارت صحت نے شہید فلسطینی بچے کی شناخت خلیل محمد شلالدہ کے نام سے کی ہے جس کی عمر 16 سال بیان کی جاتی ہے۔ اس کا آبائی تعلق الخلیل کے سعیر قصبے سے ہے۔ اس سے قبل 12 نومبر 2015 ء کو اس کے ایک بھائی محمود شلالدہ بھی صہیونی فوج کی دہشت گردی کے نتیجے میں جام شہادت نوش کرچکے ہیں۔
بیت لحم میں شہادتیں:جمعرات کے روز اسرائیلی فوج کی وحشیانہ دہشت گردی میں مغربی کنارے کے جنوبی شہر بیت لحم میں ’’غوش عتصیون‘‘ کالونی کے قریب تین فلسطینیوں کو شہید کیا گیا۔
عبرانی میڈیا کی رپورٹس میں بتایا گیا ہے کہ تینوں فلسطینیوں کو یہودی فوجیوں پر چاقو سے حملوں کی کوشش کے دوران گولیاں ماری گئیں جس کے نتیجے میں وہ موقع پرہی دم توڑ گئے۔
فلسطینی وزارت صحت کی جانب سے جاری کردہ ایک بیان میں بتایا گیا ہے کہ جنوبی بیت لحم میں اسرائیلی فوج کی کارروائیوں میں تین فلسطینیوں کو شہید کیا گیا ہے۔
وزارت داخلہ کی رپورٹ میں شہید ہونے والے تینوں شہدا کی شناخت محمد کوازیہ، احمد سالم کوازیہ اور علاء عبد کوازیہ کے ناموں سے کی گئی ہے۔ شہید ہونے والے تمام فلسطینیوں کا تعلق سعیر قصبے سے بتایا جاتا ہے۔خیال رہے کہ پچھلے سال اکتوبر کے بعد سے جاری تحریک انتفاضہ کے دوران اسرائیلی دہشت گردی میں اب تک 149 فلسطینی شہید ہوگئے۔ شہداء میں 28 بچے اور 7 خواتین بھی شامل ہیں۔چار فلسطینی شہداء کا بدلہ لینے کا اعلان-

مرکزاطلاعات فلسطین