صومالیہ: موغادیشو میں صدارتی محل کے سامنے خودکش حملہ

صومالیہ کے دارالحکومت موغا دیشو میں صدارتی محل کے قریب ایک خوکش بمبار نے منگل کے روز خود کو دھماکے سے اڑا لیا۔
صدارتی محل کے ایک گارڈ کے مطابق دھماکا صومالی وزیر اعظم کے سیکرٹریٹ اور ایتھوپیئن سفارتخانے کے درمیان والی دیوار کے قریب کیا گیا۔ صدارتی محل اسی کمپاؤنڈ میں ہے جہاں دونوں عمارتیں واقع ہیں۔

خودکش حملے میں چھے افراد جاں بحق جبکہ متعدد افراد زخمی ہو گئے ہیں۔ صومالی فوج کے ایک عہدیدار نے بتایا کہ تمام ہلاکتیں وزیر اعظم عبدی فرح شیردون کے دفتر کے سامنے ہونے والے بم دھماکے میں ہوئیں۔

جائے وقوعہ کے قریب موجود صومالی عہدیدار عبدالقادر علی نے بتایا کہ وزیر اعظم سیکرٹریٹ کے سامنے دھماکے میں مرنے والے چھے افراد کی لاشیں انھوں نے خود دیکھی ہیں۔ لاشیں بری طرح مسخ ہو چکی تھیں اور جسمانی اعضاء کمپاؤنڈ کی دیوار کے آس پاس پڑے تھے۔

ایجنسیاں