اسرائیلی لڑاکا طیاروں کی غزہ میڈیاکمپلکس پربمباری

غزہ سے العربیہ کی نامہ نگار نے بتایا ہے کہ اسرائیلی لڑاکا جہازوں نے غزہ میں ایک کمپلیکس کو نشانہ بنایا ہے جس میں میڈیا کے دفاتر واقع ہیں۔ شہر کے مرکز میں واقع برج الشو پر اسرائیلی فوج نے تین میزائل فائر کئے۔

اسرائیلی ذرائع نے بتایا کہ اسرائیل کے لڑاکا طیاروں نے ہفتے کے روز غزہ کے مختلف علاقوں پر 300 حملے کئے۔

بمباری میں اور فضائی حملوں میں غزہ میں فلسطین کی مستعفی حکومت کے دفاتر کو نشانہ بنایا گیا۔ انہی ذرائع نے یہ بھی دعوی کیا کہ ایک حملے میں عزالدین القسام کے ائر ڈیفنس شعبے کے کمانڈر اسامہ القاضی بھی شہید کر دیئے گئے۔

ادھر غزہ سے ہفتے کے روز داغے جانے والے میزائلوں کی تعداد انہی ذرائع نے 165 بتائی ہے۔ ان میزائیلوں کی بڑی تعداد اسرائیل کے جنوبی علاقے مغربی صحرائے نقب میں گری۔

اسرائیل میں نصب میزائل شکن ‘آئرن ڈوم سسٹم’ نے 36 میزائیلوں کو فضا ہی میں تباہ کر دیا۔
تباہ کئے جانے والے میزائلوں میں تل ابیب پر فائر کئے گئے ‘فجر 5’ طرز کے میزائل بھی شامل تھے۔ ‘دھویں کے ستون’ کوڈ نام سے جاری اسرائیلی آپریشن کے آغاز سے ابتک آئرن ڈوم میزائل شکن سسٹم غزہ سے فائر کردہ تین سو میزائل تباہ کر چکا ہے۔

ہفتے کے روز غزہ پر اسرائیلی حملوں میں خواتین اور بچوں سمیت چودہ فلسطینی شہید ہوئے۔
حماس کے عسکری شعبے کے عزالدین القسام کے ترجمان کا کہنا ہے کہ اس کے جنگجوؤں نے تل ابیب اور بیت المقدس سمیت اسرائیل کے مختلف شہروں پر 900 حملے کئے۔ ترجمان ابوعبیدہ نے دعوی کیا کہ ان کے القسام ائر ڈیفنس یونٹ نے اسرائیلی لڑاکا طیارہ بھی مار گرایا جو غزہ سے متصل سمندر میں جا گرا۔ نیز حماس نے دو بغیر پائیلٹ اسرائیلی ڈرونز بھی مار گرانے کا دعوی کیا ہے۔

ابوعبیدہ نے مزید کہا کہ القسام نے بتایا کہ ہم نے اسرائیل کے اہم اور حساس مقامات کو نشانہ بنایا ہے۔ ان میں بری اور فضائی فوج کے بیس اسٹیشن اور ہیلی پیڈز شامل ہیں۔ ہمارے حملوں کے خوف سے پانچ ملین اسرائیلی شہری زیر زمین بنکروں اور مخفوظ پناہ گاہوں میں رہنے پر مجبور ہیں۔ نیز القسام نے ہفتے کے روز غوش عتصیون کے اہم فوجی مرکز کو بھی میزائل حملے سے نشانہ بنایا۔

القسام کے میڈیا ترجمان ابو عبیدہ نے دعوی کیا کہ اس کے مجاہدین نے غزہ کی پٹی سے تین کلومیٹر دور ایک فوجی جیب گھات لگا کر تباہ کی۔ حملے کے بعد اسرائیلی امدادی پارٹیاں گھنٹوں کی تاخیر سے جائے حادثہ پر پہنچ سکیں۔

غزہ
نامہ نگار العربیہ، ایجنسیاں