قندہار (اے ایف پی /جنگ نیوز) افغانستان کے جنوبی صوبہ قندہار میں پولیس تربیتی کمپاؤنڈ پر طالبان کے حملے میں10افغان اہلکارہلاک ہوگئے اور عام شہریوں سمیت 12زخمی ہوگئے جبکہ جوابی کارروائی میں 4حملہ آوربھی مارے گئے۔
طالبان کے ترجمان قاری یوسف احمدی نے واقعہ کی ذمہ داری قبول کرتے ہوئے دعویٰ کیا ہے کہ حملہ میں 27افغان فوجی ہلاک ہوئے۔دریں اثناء صوبہ شمالی صوبہ فاریاب میں نیٹواورافغان فوج نے مشترکہ کارروائی کرتے ہوئے گزشتہ روز2امریکی فوجیوں کی ہلاکت میں مبینہ طورپر ملوث افغان باڈرفورس کے اہلکار کی شناخت کرکے قتل کردیا۔
امریکا افغانستان کے لئے روس سے 21 فوجی ہیلی کاپٹر خریدنے کا معاہدہ کر رہا ہے جس کی مالیت370 ملین ڈالر ہے۔
جمعرات کو قندہار میں خودکش جیکٹ پہنے4 طالبان حملہ آوروں نے پولیس کے تربیتی مرکز پر دھاوابول دیا اورٹریننگ سینٹر سے ملحق عمارت پر قبضہ کرکے لوگوں کو یرغمال بنالیا اور فائرنگ کی جبکہ کمپاؤنڈ کے گیٹ پر بارود سے بھری ایمبولینس کو دھماکا خیز مواد سے اڑادیا گیا ۔