حجاج کرام کی خدمت کے لیے چھ سعودی ایئرپورٹس مختص

سعودی عرب کی جنرل اتھارٹی آف سول ایوی ایشن کے صدر عبدالعزیز الدعیلج نے کہا ہے کہ سفری نظام کو تیار کرنے اور اس کی تیاری کو بڑھانے کے منصوبوں کے تحت حجاجِ کرام کی خدمت کے لیے 6 اہم ہوائی اڈے مختص کیے گئے ہیں۔
جدہ کے کنگ عبدالعزیز انٹرنیشنل ایئرپورٹ نے 2025 کے دوران تقریباً 52 ملین مسافروں کا ریکارڈ درج کیا۔ یہ بات انہوں نے “واحہ ایوی ایشن” اور حج کانفرنس اور نمائش میں شریک متعدد اداروں کے سٹالز کے دورے کے دوران کہی۔
الدعیلج نے وضاحت کی کہ ایوی ایشن کا شعبہ ہوائی اڈوں کی ترقی، ان کی گنجائش کو بڑھانے اور ایسی خدمات فراہم کرنے کے ذریعے “سعودی ویژن 2030” اور “ضيوف الرحمن سروس پروگرام” کے اہداف کے حصول کے لیے ایک بنیادی ستون کی حیثیت رکھتا ہے۔ ضیوف الرحمن سروس حاجی کے مملکت میں آمد سے لے کر اس کی روانگی تک کے سفر کو آسان بنانے میں مدد دیتی ہیں۔
ضيوف الرحمن کی سروسز کے لیے مختص ہوائی اڈوں میں جدہ میں کنگ عبدالعزیز انٹرنیشنل، مدینہ منورہ میں پرنس محمد بن عبدالعزیز انٹرنیشنل، ریاض میں کنگ خالد انٹرنیشنل، دمام میں کنگ فہد انٹرنیشنل، طائف انٹرنیشنل ، اور ینبع میں پرنس عبدالمحسن بن عبدالعزیز انٹرنیشنل ایئرپورٹ شامل ہیں۔

جدہ، مدینہ اور طائف میں توسیعی منصوبے
الدعیلج نے ہوائی اڈوں کی ترقی کے منصوبوں کا جائزہ لیا جن میں سب سے پہلے کنگ عبدالعزیز انٹرنیشنل ایئرپورٹ پر چوتھے ٹرمینل کی جدید کاری شامل ہے جس کی گنجائش 15 ملین سے زائد مسافروں کی ہے اور حجاج ٹرمینل کی گنجائش کو 16 ملین مسافروں تک بڑھانا ہے۔ مدینہ منورہ میں پرنس محمد بن عبدالعزیز انٹرنیشنل ایئرپورٹ کی توسیع کے منصوبے کا مقصد گنجائش کو 8 ملین سے بڑھا کر 18 ملین مسافروں تک کرنا ہے اور اس کا کام اکتوبر 2027 میں مکمل ہونا طے پایا ہے۔
اس کے متوازی طور پر طائف انٹرنیشنل ایئرپورٹ کی گنجائش کو بڑھا کر تقریباً 1.1 ملین مسافروں تک کیا جا رہا ہے جس سے ضيوف الرحمن کی نقل و حرکت کو مدد ملے گی اور رش کے سیزن کے دوران عملی کارکردگی میں بہتری آئے گی۔

6.7 ملین سامان کے بیگز کا انتظام
“مسافر بلا حقيبة” یعنی ’’ بیگیج کے بغیرمسافر‘‘ پروگرام نے چار سال قبل اپنے آغاز سے لے کر اب تک تقریباً 4.5 ملین حجاج کو خدمات فراہم کی ہیں۔ اس دوران حجاج کی رہائش گاہوں سے جہازوں تک سامان منتقل کر کے تقریباً 6.7 ملین بیگز کو سنبھالا گیا۔
اس پروگرام کا مقصد انتظار کے وقت کو کم کرنا اور روانگی کے طریقہ کار کو آسان بنانا ہے کیونکہ یہ حاجی کو اپنی رہائش گاہ سے ہی سفری طریقہ کار مکمل کرنے اور سامان بک کروانے کی سہولت دیتا ہے۔ ساتھ ہی گروپس کی سفری خدمات، الیکٹرانک گیٹس اور “مکہ روڈ” اقدام کو بھی وسعت دی جا رہی ہے۔ ان خدمات میں زمزم کے پانی کے کینز کی پہلے سے ترسیل بھی شامل ہے جس سے حجاج پر سے انہیں اٹھانے کی مشقت کم ہوتی ہے اور سفری تجربے کو مزید آسان بنانے میں مدد ملتی ہے۔

13 ٹرمینلز اور 22 ہزار اہلکار
حج کے سیزن کے لیے سعودی ہوائی اڈوں کی تیاریوں میں حجاج کے لیے مختص 13 سفری ٹرمینلز کی تیاری شامل ہےجن میں 22 ہزار سے زائد مرد و خواتین اہلکار کام کر رہے ہیں تاکہ طریقہ کار کو تیز کیا جا سکے اور ایئرپورٹس کے اندر مسافروں کی نقل و حرکت کو آسان بنایا جا سکے۔
الدعیلج نے نشاندہی کی کہ ہوائی اڈوں پر ضيوف الرحمن کی خدمت کے لیے عمومی اور نجی اداروں کے درمیان ہم آہنگی کی ذمہ دار نگرانی کمیٹی 60 سے زیادہ ارکان پر مشتمل ہے جو سرکاری اداروں اور سروس پرووائیڈرز کی نمائندگی کرتے ہیں۔
یہ کمیٹی پورے سال ہفتہ وار بنیادوں پر اپنے اجلاس منعقد کرتی ہے۔ رمضان اور حج کے سیزنز کے دوران مسافروں کی نقل و حرکت کی نگرانی کرنے، آپریشنل کارکردگی کو بڑھانے اور درپیش چیلنجز سے نمٹنے کے لیے یہ اجلاس روزانہ کی بنیاد پر تبدیل ہو جاتے ہیں۔
“مطارات ہولڈنگ” اپنے ذیلی اداروں مطارات ریاض، مطارات جدہ، مطارات دمام اور تجمع مطارات الثاني کے ذریعے مملکت کے 27 ہوائی اڈوں کے آپریشنز کی نگرانی کرتی ہے۔ یہ قومی ٹرانسپورٹ اینڈ لاجسٹکس سٹریٹجی سے نکلنے والی قومی ایوی ایشن سٹریٹجی کے اہداف کے عین مطابق ہے۔