ریمنڈ ڈیوس کی عدم رہائی پر پاکستان کیخلاف سفارتی و اقتصادی کارروائی کی جاسکتی ہے۔ ۔ ۔ امریکا

واشنگٹن (ثناء نیوز)مریکہ نے کہا ہے کہ ریمنڈ ڈیوس کی رہائی کے مسئلہ پر بات چیت میں پیش رفت ہورہی ہے۔مسئلہ جلدحل نہ ہوا تو پاکستان کے خلاف سفارتی اور اقتصادی اقدامات کئے جاسکتے ہیں۔

امریکی حکام کے مطابق ریمنڈ ڈیوس کیس پر پاکستان سے بات چیت میں پیشرفت ہورہی ہے تاہم معاملہ جلد حل نہ ہوا تو پاکستان کے خلاف مالیاتی اور سفارتی کارروائی کی جاسکتی ہے جس میں پاکستانیوں کو ویزا کے اجراء اور امداد کی فراہمی میں سست روی شامل ہے اس کے علاوہ بعض پاکستانی سفارتکاروں کو ناپسندیدہ شخصیت بھی قرار دیا جاسکتا ہے۔کسی بھی طرح کے اقدامات کا دار و مدار پاکستان میں رونما ہونے والے واقعات پر ہوگا اور ریمنڈ ڈیوس کی رہائی کی امید تک کوئی اقدام نہیں کیا جائے گا۔
امریکی حکام کے مطابق ریمنڈ ڈیوس کی رہائی کے لئے ڈپلومیٹک فارمولا وضع کرنے میں معمولی پیشرفت ہوئی ہے۔اس سفارتی کلیہ کے تحت پاکستان ریمنڈ ڈیوس کو رہا کرسکتا ہے۔
امریکی حکام کا کہنا ہے کہ پاکستان نے اب تک سرکاری طور پر کنٹریکٹرز کی فہرست طلب نہیں کی۔دوسری جانب امریکی محکمہ خارجہ کے ترجمان پی جے کرولی نے اصرار کیا کہ امریکی ایجنٹ ریمنڈ ڈیوس کو سفارتی استثنیٰ حاصل ہے۔رہائی کیلئے پاکستانی حکومت اور عدالتوں پر دباؤ جاری رہے گا۔ ادھر امریکا نے ایک بار پھر کہا ہے کہ دو پاکستانیوں کو قتل کرنے والے امریکی شہری ریمنڈ ڈیوس کو سفارتی استثنیٰ حاصل ہے اور اس کی رہائی کے لیے پاکستانی حکومت اور عدالتوں پر زور دیتے رہیں گے ۔
امریکی محکمہ خارجہ کے ترجمان پی جے کراؤلی نے واشنگٹن میں پریس بریفنگ کے دوران ایک بار پھر کہا ہے کہ پاکستان میں گرفتار ریمنڈ ڈیوس کو فوجداری مقدمات میں مکمل استثنیٰ حاصل ہے ۔ ان کا کہنا تھا کہ یہ معاملہ پاکستان کی ماتحت عدالت میں زیر سماعت ہے اگر حکومت پاکستان نے استثنیٰ کی دستاویزات جمع نہیں کرائیں تو عدالت یہی سمجھے گی کہ ریمنڈ ڈیوس کو استثنیٰ حاصل نہیں ۔ انہوںنے کہا کہ ریمنڈ سے متعلق حکومت پاکستان کو جنوری 2010ء میں آگاہ کر دیا گیا تھا اور اسے سفارتی نوٹ بھی فراہم کر دیا گیا تھا.