اسلام آباد(جنگ نیوز) سیدنا عمرفاروق رضی اللہ تعالیٰ عنہ کے یوم شہادت کے موقع پر ملک کے مختلف شہروں میں ریلیاں نکالی گئیں۔یوم فاروق کے موقع پر اسلام آباد میں کراچی کمپنی اور دارالعلوم تعلیم القرآن راجا بازار راول پنڈی سے جلوس نکالے گئے۔
ریلیوں سے خطاب کرتے ہوئے مقررین نے سیدنا فاروق اعظم کی اسلام کیلئے خدمات کو خراج عقیدت پیش کیا اور کہا کہ سید نا فاروق اعظم دنیا کے پہلے حکمران ہیں جنہوں نے عدلیہ کو انتظامیہ سے علیحدہ کیا اور ریاستی ڈھانچے کو جمہوری خطوط پر استوار کیا ۔
جلوسوں سے خطاب میں علامہ مسعود الرحمان عثمانی ،علامہ مفتی تنویر عالم اورمولانا اشرف علی سمیت دیگرمقررین کاکہناتھاکہ فاروق اعظم کی زندگی مسلمان حکمرانوں کے لئے باعث تقلیدہے۔ مقررین نے مطالبہ کیاکہ فاروق اعظم رضی اللہ تعالی عنہ کے یوم شہادت پر سرکاری تعطیل کا اعلان کیا جائے۔
یوم فاروق اعظم کی مناسبت سے کراچی پریس کلب تک ریلی نکالی گئی۔اس موقع پر مقررین کا کہنا تھا کہ حضرت عمر فاروق کے دیے ہوئے نظام حکومت کو نافذ کرنے سے ہی ملک میں امن قائم ہو گا۔
سرگودھا میں جامع مسجد بلاک نمبر ایک سے شربت چوک تک ریلی نکالی گئی۔ سکھر میں بھی مینارا روڈ سے پریس کلب تک ریلی نکالی گئی اور اس دن عام تعطیل کرنے کا مطالبہ کیا گیا۔