چمن/کابل(جنگ/اے ایف پی) افغانستان کے صوبے ہلمند میں طالبان نے گھات لگا کر امریکی قافلے پر راکٹوں
سے حملہ کیا جس کے نتیجے میں 4 امریکی فوجی ہلاک ہوگئے جبکہ پکتیامیں بم دھماکے میں متعدد امریکی فوجی ہلاک اورٹینک تباہ ہو گیا.
جبکہ صوبہ لوگر کے ضلع چرخ میں نیٹو طیاروں نے فضائی حملے کرکے غلطی سے افغان فوج کو نشانہ بنایا جس کے نتیجے میں 3 فوجی ہلاک اور5 زخمی ہوئے۔
صوبے ننگرہار کے ضلع حصارک میں نیٹو کا فوجی ہیلی کاپٹر گر کر تباہ ہو گیا ہے۔ نیٹو نے کہا ہے کہ کوئی فوجی ہلاک یا زخمی نہیں ہوا جبکہ طالبان نے دعویٰ کیا کہ ان کے مجاہدین نے ایک ہی دن میں دو امریکی ہیلی کاپٹروں کو مارگرایا ہے جن میں 40 سے زائد فوجی عملہ سمیت ہلاک ہوئے ہیں۔
طالبان نے جولائی 2009ء میں پکڑے گئے امریکی فوجی کی نئی ویڈیو جاری کر دی ہے ۔ زابل کے ضلع شملزئی میں طالبان اور افغان فورسز کے درمیان لڑائی ہوئی سرحدی فورسز کے کمانڈر انچیف جنرل عبدالرازق کا کہنا ہے کہ لڑائی میں 7 طالبان کو ہلاک کر دیا ہے جبکہ طالبان ترجمان قاری یوسف احمدی کا دعویٰ ہے کہ جھڑپ میں 60 افغان اہلکار ہلاک کر دیئے ہیں۔