زاهدان ءِ هۆنێں جمعه بےهۆشی ئێں پێشامدے نه انت

گۆں زاهدان ءِ هۆنێں جمعه ءِ پێشامد ءِ سالگشت ءِ نزیک بوگ ءَ، شیخ‌الاسلام مولانا عبدالحمید ماں زاهدان ءِ نمازجمعه ءِ دیوان ءَ (3 مهرماه 1405/ 23 سپتمبر 2026) آ پێشامد ءَ سک دلبرێجۆک ءُ دل‌رێش کنۆک زانت ءُ گۆں اے بیان ءَ که زاهدان ءِ هۆنێں جمعه بےهۆشی ئێں پێشامدے نه انت، په آ پێشامد ءِ شهید ءُ ٹپیاں دعای خیر ئی کرت.

په سنی‌آنلاین ءِ سرهال ءَ مولانا عبدالحمید گوشت: 8 مهر (1401) ءِ هۆنێں جمعه ءِ پێشامد سک دلبرێجۆک ات که تیوگێں دنیا ءَ جسکێنت ئی. ماں آ پێشامد ءَ بازێں نمازوانۆکے بےهچ گناهے کشگ بوت انت ءُ بازێنے هم ٹپی ءُ ملش ءُ کۆر بوت انت. ماں 13 آبان ءَ هم گونڈترێں پێشامدے خواش ءَ کپت.

واجه ءَ درائێنت: زاهدان ءِ هۆنێں جمعه بےهۆشی ئێں پێشامدے نه انت. ما پهکاں دعا کن اێں که الله پاک آ پێشامد ءِ شهیداں برزێں درجه دنت ءُ ٹپیاں دروا ءُ مدت کنت.

🔹جنگ ڈیه ءِ ملکانی چَٹی/ضرر ءَ ءُ بدواهانی سۆب ءَ انت؛ کارمستراں گۆں جنگۆلاں ءُ گۆں وتی مردماں گپءُتران کن انت

مولانا عبدالحمید ماں دگه بهرے شه وتی هبراں گوشت: جنگ ڈیه ءِ ملکانی چٹی ءَ ءُ میان‌رۆدرآت ءِ بدواهانی سۆب ءَ انت. بازێنے لۆٹ انت میان‌رۆدرآت ءِ ملکاں، هاسکار اسلامی ءُ همسایگێں ملکاں گۆں وت جنگ کن انت ءُ آوان آسودگ ءَ نند انت.

واجه ءَ مچێں پاٹیان په گپءُتران ءَ سۆگه کرت ءُ گوشت ئی: گهترێں راه همێش انت که گۆں مچێں پاٹیاں که په گپءُتران ءَ تیار انت، ترانکاری بیت. مئے ملک ءِ کارمستراں هم گۆں تیوگێں جنگۆلاں ءُ گۆں وتی مردماں گپءُتران کن انت تاں ایران ءِ مردمانی سکی‌سۆریاں گیشءُگیوار به انت.

🔹هلاکه ءِ امنیت بائد پهازگ بیت؛ لۆٹاں شه «مدنی راهاں» رندگیری به انت

مولانا عبدالحمید وتی هبرانی دێمتر ءَ هلاکه ءِ امنیت ءِ باروا کڈن کرت ءُ گوشت ئی: انونێں پێشامداں که ماں هلاک ءَ پێش آتگ انت، بیت‌کنت هلاکه ناامنی ءِ آماچ بیت. من پهکێن مردماں که هلاکه ءِ ته ءَ ءُ ڈن ءَ انت سۆگه کن آں که هلاکه ءِ امنیت ءَ سات انت.

واجه ءَ گێش کرت: بازێں مردمے هلاکه ءِ ته ءَ زند گوازێن انت، بازێنے شه ایران ءِ مردماں ماں اے هلاکه ءَ سۆب ءُ باپاری دار انت ءُ رو انت ءُ کاینت. مزن‌شهدربرجاه ءُ دینی وانگجاه ءُ سرکاری وانگجاه هست انت ءُ مردماں کٹءُکار دار انت. پمێشا بائد انت هلاکه ءِ امنیت پهازگ بیت تاں مردمانی زندمان ءُ کٹءُکاراں گڈءُوڈ مه به‌انت ءُ مردماں توان انت گۆں امنیت ءَ زند گوازێن انت.

زاهدان ءِ آدێنگ ءِ امام ءَ کڈن کرت: لۆٹاں شه مدنی راهاں رندگیری به انت ءُ تاں وهدے که امێتے هست رندگیری بیت.

🔹ڈاکٹر سالارزهی رحمه‌الله مردمی ءُ علمی انسانےات/ ڈاکٹر سالارزهی ءِ مرک ءِ سوب ءِ شوهاز بےدۆزواهی ءُ خداپسندانه به انت

مولانا عبدالحمید وتی هبرانی گڈسر ءَ گۆں اشاره به ڈاکٹر سالارزهی، سیستان ءُ بلوچستان ءِ «پارک علم ءُ فناوری» ءِ سرمستر ءِ بێرانی ءَ گوشت: ڈاکٹر سالارزهی ءِ ناوشێں بێرانی بازێں پرێشانیانی سوب بوت. هدامرزی سالارزهی مردمی ءُ متواضع ئێں انسانےات. آئی علمی مردم ءُ شۆهازکارےات که شه آئی بازێں نبشتانکے ماں ته ءِ ءُ میان‌استمانی تاکبنداں شنگ بوتگ انت.

واجه ءَ گێش کرت: ڈاکٹر سالارزهی رحمه‌الله جاگه ءُ پست ءِ پد ءَ نه ات، بلے شه مردمانی هزمت کنگ ءَ هم وت ءَ نه دز ات ئی، اگں اگدهے دیگ بوتێں په جوانی آیرا پیلو ئے کرت. چۆشێں مردم ءِ بێرانی په چاگرد ءَ مزنێں تاوانے.

زاهدان ءِ آدێنگ ءِ امام ءَ گوشت: ڈاکٹر سالارزهی ءِ بێرانی ءِ باروا شک ءُ شبهه هست انت که ما را امێت هست کارمسترانی شۆهازاں بےدۆزواهی ءَ ءُ خداپسندانه به انت تاں پێشامد ءِ گواچن درا به انت ءُ مردمانی شکاں پسو دیگ به انت.