ریمدان ءِ سیمسر ءِ بےرهبندی ءُ اڈنگ‌بڑنگی

محمدانور بجارزهی، چهبار ءِ جهگیر ءَ گوشتگ که ریمدان ءِ سیمسر ءِ چێرساچی ءُ لڈءُباری مشکلانی رندگیری بوگ ءَ انت تاں گۆں زرءُبنمال ءِ پجائێنگ ءَ اے مشکلاں گیشءُگیوار به انت.

آئی گوشت: ما اے بن‌گپ ءِ رندگیری ءَ اێں که شتءُآت شه اے سیمسر ءَ آسان بیت، ٹراکانی هلائێنۆکاں باز مامانگ/معطل مه به انت ءُ الکاپێن آسراتی په سوداگراں پجائێنگ بیت.

گوشگی انت که ریمدان ءِ سیمسر که یکے شه ایران ءُ پاکستان ءِ نیام ءِ باپار ءُ سۆداگری لڈءُبارانی مهمێں جاگهاں انت، سک ءَ بےرهبندی ءِ دۆچار انت ءُ هلائێنۆکاں چنکه رۆچ، شپاں تاں سهباں په وتی نوبت ءَ ودار انت. نه آسودگی ءِ آسراتے هست ءُ نه شه وتی نوبت ءِ وهد ءَ سهی انت. هلائێنۆکاں په کٹءُکار ءَ سیمسر ءَ آتگ انت، بلے ماں گرمێں هوا ءُ نگێگێں جاور ءَ سربتگ انت.