ایران ءِ مردمانی حق شه هر چیزے پێش‌تر انت/ میان‎‌رۆدرآت عادلانه، سرجم ءُ مدامی ئێں سهل ءِ وازمندگ انت

شیخ‌الاسلام مولانا عبدالحمید ماں زاهدان ءِ نمازجمعه ءِ دیوان ءَ (۲۲ خرداد ۱۴۰۵/ 12 جون 2026) گۆں شرگداری شه بازێں گرانیاں، کڈن ئی کرت که مردمانی سۆب شه هر چیزے پێش‌تر به انت ءُ پکا اول مردمانی رۆزیگی جاور چارگ بیت. واجه ءَ همےرنگ گۆں میان‌استمانی چستءُاێرانی دلگۆش کنگ ءَ شه جهانی زۆرآوراں لۆٹ ات که میان‌رۆدرآت ءِ جنگ ءَ هلاس کن انت. واجه صاحب همےرنگ مدامی ئێں سهل، فلسطینانی حقانی رسگ ءُ ایران ءُ پاکستان ءِ باپاری راهانی امنیت ءِ لۆٹۆک بوت.

  
🔹مردمانی رۆزیگی سکیانی رندگیری شرعی ءُ راجی زلورتے

​مولانا عبدالحمید گۆں اشاره به گرانی ءُ ملک ءِ مالزانشتی گپچل ءَ گوشت: ایران ءِ مردمانی حق پێش‌تر انت. هچ کجام شه دنیا ءِ مظلومانی حق شه ایران ءِ مردمانی حق ءَ پێش‌تر نه انت. واجه ءَ گوشت: واجه رسول‌الله صلی‌الله‌علیه‌وسلم درائێنتگ وهدے شمے زهگ گشنگ انت حق نه دار ات دگرانَ صدقه دےات.

زاهدان ءِ آدێنگ ءِ امام ءَ کڈن کرت: ایران ءِ مڈیاں ایران ءِ مردمانی انت. بائد هاسێں مردم ءُ شرکتانی دست شه اے مڈیاں کۆتاه بیت تاں اے مڈیان مردماں دیگ به انت.
واجه ءَ درشان کرت: اے پهکانی اگده انت که دزی، هلوچ‌گری ءُ ظلم ءَ دێمداری کن انت. عالماں هم بائد په ملک ءِ سیستم ءُ کارمستری ءُ چاگرد ءِ اصلاح ءَ کۆشست کن انت.

🔹پله‌مرزی شه سهل ءَ ءُ چپ بیگ گۆں جنگ ءَ

​​زاهدان ءِ آدێنگ ءِ خطیب ءَ گۆں اے پاگپ ءِ وانگ ءَ «وَإِنْ جَنَحُوا لِلسَّلْمِ فَاجْنَحْ لَهَا وَتَوَكَّلْ عَلَى اللَّهِ» ءُ گۆں اشاره به مهتر علی رضی‌الله‌عنه ءِ نمدی ءَ ماں نهج‌البلاغه ءَ که اۆد ءَ هست انت: «اگه دشمن سهل ءِ نێمگ ءَ لێٹ ات، گڑا تو آیرا رد مکن؛ پچےکه سهل ءِ ته ءَ استمان ءِ امنیت ءُ لشکر ءِ تاهیر انت.» په سهل ءِ منّگ ءُ پهرێز شه جنگ ءَ کڈن ئی کرت.

واجه ءَ گێش کرت: جنگ بێران‌کنۆک انت ءُ ملک ءِ مڈیانَ تباه کنت. ما پێش شه اے جنگانی بنگێج بوگ ءَ گۆں دلسۆچی ءَ ڈاه دات ءُ کوکار کرت که په دێمداری شه جنگ ءَ کۆشست بیت. 

🔹میان‌رۆدرآت عادلانه ءُ مدامی ئێں سهل ءِ وازمندگ انت
​ مولانا عبدالحمید شه دنیا ءِ زۆرآوراں (امریکا، چین، روس ءُ یوروپ) ءَ لۆٹ ات که په میان‌رۆدرآت ءِ سهل ءَ کارے کن انت ءُ کڈن ئی کرت: میان‌رۆدرآت دنیا ءِ مالزانشت ءِ شاهرگ انت که سرجمێں سهلے ءِ وازمندگ انت که آئی ته ءَ پهکانی سۆباں پوره به انت. بائد عادلانه ئێں سهلے بیت؛ فلسطینیانی حقاں دیگ به انت که وتی جتائێں ملک ءِ واهند به انت ءُ اسرائیل هم مسلمانێں ملکانی نێمگ ءَ دست دراج مه کنت ءُ وتی حق ءَ داشته بیت.

واجه ءَ گێش کرت: اگاں ​اے جیڑہ شه رۆتگ ءَ گیشءُگیوار بیت، گڑا نیابتی جنگاں ءُ سلاهی تاچگاں ھلاس بنت ءُ ھچ ملکے موشک/ میزائل ءُ بم ءِ جوڑ کنگ ءِ کۆشست ءَ نه کنت.

مولانا عبدالحمید مالزانشت ءُ کارءُدندا ءَ شه مردمانی بنی وازمندیاں زانت ءُ کڈن ئی کرت که دنیا ءَ انچێں هم‌ستکی ئے لۆٹ ایت که مچاں چِه دیندار ءُ چِه بےدین توان انت گۆں آزاتی ءُ تاهیر ءَ زند گوازێن انت. واجه گۆں پله‌مرزی شه آسبندی ءَ مدامی ئێں توجیلے ءِ لۆٹۆک بوت تاں ایران، عربی ءُ همسایگێں ملکاں به تاهیر ءُ وتی مشروعێں لۆٹاں رس انت.

 
🔹کڈن په سیمسری باپاری ءِ امنیت ءَ ءُ مردمانی توارانی اشکنگ ءَ
​ مولانا عبدالحمید رۆدراتکی بلوچستان ءُ پاکستان ءِ سیمسر ءِ راهانی نونێں ناامنی ءُ سوداگری سامان ءُ ورگی برۆکێں ماشین/گاڑیانی بن دیگ ءِ بابت ءَ مزنێں دلپدردی ئے درشان کرت ءُ گوشت ئی: دریابی باپاری ءِ مشکلانی سوب ءَ مردماں په لاچاری هشکی ءِ راهاں کارمرز کن انت، بلے اے راهانی ناامنی ءَ سیستانءُبلوچستان ءِ مردم ءُ رۆدراتکی بلوچستان ءِ مردمانی زندگی ءَ سکیانی آماچ کرتگ.

زاهدان ءِ آدێنگ ءِ امام ءَ گوشت: شه پاکستان ءِ کامستراں لۆٹ اێں که سوداگری ءِ امنیت ءَ پجائێن انت. شه رۆدراتکی بلوچستان ءِ مردماں هم همێشرا لۆٹ اێں که وتی ءُ سرکار ءِ جێڑهانی نیمۆن ءَ راهاں بند مه کن انت ءُ مردمانی باپار ءُ ناجۆڑاں تاوان مه رسێن انت.

شیخ‌الاسلام مولانا عبدالحمید وتی هبرانی گڈسر ءَ دنیا ءِ پهکێں کامستراں همگیرێں سۆگه ئے کرت ءُ گوشت ئی: ما مچێں کارمستراں سۆگه کن اێں که وتی مردمانی هبراں گۆش دار انت ءُ مشکل ءُ جێڑهاں په جوانی ءُ گۆں ترانکاری ءَ گیشءُگیوار کن انت.