بندیگانی سزا دیگ ءُ آوانی بےشرپی کنگ گۆں دین اسلام ءُ انسانی تب ءَ چپ انت

شیخ‌الاسلام مولانا عبدالحمید، ماں زاهدان ءِ نمازجمعه ءِ دیوان ءَ (24 اسفند 1403/ 14 مارس 2025) گۆں اشاره به شکایت ءُ سرهالاں شه «بندیگانی سزا دیگ ءُ رڈێں کرداراں گۆں آوان» ماں اهواز ءِ بندیجاهاں بندیگانی سزا دیگ ءُ بےشرپی کنگ ءَ دین اسلام ءُ انسانی تب ءِ چپ ءَ زانت ءُ شه کارمستراں لۆٹ ات اهواز ءِ مردمانی جاور ءَ چار انت.

🔹رۆچگ ءِ ماه ءَ که رحمت ءِ ماه انت، گۆں بندیگاں په جوانی کردار بیت

په سنی‌آنلاین ءِ سرهال ءَ مولانا عبدالحمید گوشت: رۆچگ ءِ مبارکێں ماه رحم ءُ همدردی ءُ اۆپار ءِ ماه انت. یکے شه دین اسلام ءِ مهمێں سۆگه ئاں ترحم گۆں بندیگاں ءُ جوانی کنگ گۆں آوان انت. ارماں که لهتے شه مسلماناں شه اسلام ءِ تعلیماں باز دور انت. انسانیت ءِ لۆٹ هم همێش انت که تیوگێں ساهدارانی سرا رحم بیت.

واجه ءَ گێش کرت: بندیگانی سزا دیگ ءُ بےشرپی کنگ گۆں دین اسلام ءُ انسانی تب ءَ چپ انت. دین اسلام ءَ په جوانی کنگ گۆں بندیگاں سک سۆگه کرتگ؛ «وَيُطْعِمُونَ الطَّعَامَ عَلَى حُبِّهِ مِسْكِينًا وَيَتِيمًا وَأَسِيرًا» [انسان: 8] واجه رسول‌الله صلی‌الله‌علیه‌‎وسلم ءُ صحابیاں گۆں جنگ بدر ءِ اسیراں باز جوانی کرتگ ءُ شه هما اتُکے که وت اش وارتگ آوان اش هم داتگ ءُ همے چیز سوب بوت که دنیا شه دین اسلام ءَ متأثر بیت.

مولانا عبدالحمید درائێنت: مئے لۆٹ همێش انت که ماں رمضان ءِ مبارکێں ماه ءَ که رحمت ءِ ماه انت گۆں بندیگاں جوانی بیت تاں وهدے که آزاتَ به انت، شه بندیجاه ءِ واکدارانی کرداراں متأثر به انت.

🔹کارمستراں اهواز ءِ درێں مردمانی هیالداری کن انت

🔹پاگواجه ءُ سیاسی بندیگانَ آزات کن ات

مولانا عبدالحمید گوشت: اهواز یکے شه ملک ءِ هزگارێں ڈیهاں انت. کارمسترانَ سۆگهَ کن اێں که اهواز ءِ مردمانی هیالداری ءَ کن انت. اهواز ءِ بنیاتی ڈیلءُڈۆلاں جۆڑ کن انت. بندیگانَ که دێرێں وهدے ماں بندیجاهان انت ءُ بلکێں ماں اے دۆر ءَ آوانی ته ءَ بدلی آتگ، آجو کن ات.

واجه ءَ سک سۆگه کرت: لهتے پاگواجه ءُ زانشتجاهی هم بندیگ انت. مئے سۆگه همێش انت که تیوگێں سیاسی بندیگاں شه جنێں ءُ مردێناں آزات کن ات. بائد سیاسی بندیگاں آزات کن ات ءُ آوانی گپاں گۆش دار ات ءُ اگاں جاهے رد اش کرتگ گڑا آواں سرپد کن ات تاں منّ انت.

🔹رۆچگ ءِ ماه ءَ بندیگانی هیالداری ءَ بکن ات/ ترۆندێں کانودانی ته ءَ بدلی بیار ات

زاهدان ءِ آدێنگ ءِ امام ءَ گۆں بژن شه «پاهوانی گێشی» ءَ گوشت: بژن انت که اے رۆچاں پاهو باز بوتگ. په ما سک انت که دگه ملکانی مردماں گوش انت ایرانیاں وتی هم ملکیانَ کُش انت. پمێشا رۆچگ ءِ ماه ءَ بندیگانی هیالداری ءَ بکن ات. همے رنگ ترۆندێں کانودانی ته ءَ بدلی بیار ات.

واجه ءَ گێش کرت: ما پهکانی دلسۆچ اێں ءُ اے گپاں گۆں خیرخواهی ءُ دلسۆچی ءَ جن اێں، پچےکه زان اێں ءُ سدک اێں که لهتے کردار ءُ حکماں که دیگ به انت قیامت ءِ رۆچ ءَ سزا دار انت.

🔹«پراهدلی» ءُ «سراسری ئێں سرکار ءِ جۆڑ کنگ» ماں سوریه ءَ «ملکی تپاک» جۆڑ کنت

مولانا عبدالحمید ماں دگه بهرے شه وتی هبراں سوریه ءِ نوکێں حکومت ءِ کارمسترانَ سۆگه کرت ءُ گوشت ئی: من سوریه ءِ اسلامی سرکار ءِ کارمسترانَ په «پراهدلی» ءُ «دورچاری» ءَ سۆگه کن آں ءُ سدک آں که اے پراهدلی ءُ دورچاری «ملکی تپاک» جۆڑ کنت.

واجه ءَ «سراسری ئێں سرکار ءِ جۆڑ کنگ» ءَ ماں سوریه ءَ اثردار زانت ءُ گوشت ئی: سوریه ءِ بنیادی کانود ءُ نوکێں سرکار هرچنکه گێشتر سراسری بیت ءُ تیوگێں مردماں اۆد ءَ هوار به انت ءُ پهکانی آزاتیاں دنت، هما کساس ءَ توانت سوریه ءَ ماں نۆکێں پڑے بیار ایت.

🔹استان ءِ مردماں نورۆز ءُ بهارگاه ءِ مسافرانَ حرمت ءُ عزت کن انت

مولانا عبدالحمید وتی هبرانی دێمتر ءَ استان ءِ مردمانَ په نورۆز ءِ مسافرانی حرمت ءُ عزت کنگ ءَ سۆگه کرت ءُ گوشت ئی: ایران ءِ مردماں ماں نورۆز ءَ سفرَ کن انت. منی سۆگه په مچاں هاسکار سیستانءُبلوچستان ءِ مردماں همێش انت که مهمانانَ چۆ وتی سیاد ءُ براس ءُ گهاراں حرمت ءُ عزت کن ات.

واجه ءَ همےرنگ هلائێنۆکانَ په دگی کانودانی کمار کنگ ءَ سۆگه کرت ءُ گوشت ئی: نورۆز ءِ رۆچاں که راهاں گێشتر شلوغ بنت ءُ ارمان که دگ وئیلاں هم گێش بنت، منی سۆگه انت که درێں هلائێنۆکاں ترۆند مه رو انت ءُ دگی کانوداں کمار کن انت.

🔹استان ءِ امنیت ءَ سات ات

زاهدان ءِ آدێنگ ءِ امام ءَ وتی هبرانی گڈسر ءَ په «استان ءِ امنیت ءِ پهازگ» ءَ سک سۆگه کرت ءُ گوشت ئی: منی سۆگه په پهکاں همێش انت که استان ءِ امنیت ءَ سات انت ءُ آوان که کۆش ءُ دزی ءُ هلوچ گری ءُ ناامنی جۆڑ کن انت، دێم اش گرگ بیت.

واجه ءَ گێش کرت: امن ءُ تاهیر مچانی سۆب ءَ انت، پمێشا سک سۆگه کن آں که استان ءِ امنیت بائد پهازگ بیت.