«اثرکنۆکێں ترانکاریَ» توانت ملک ءَ شه استێں مشکلاں رکێن ایت

شیخ‌الاسلام مولانا عبدالحمید، ماں زاهدان ءِ نمازجمعه ءِ دیوان ءَ (5 بهمن 1403/ 24 جنوری 2025) «بندشانی گێشی» ءُ «جنگ» ءَ را شه مهمترێں بیهاراں په ملک ءَ زانت ءُ «اثرکنۆکێں ترانکاری ءُ گپءُتران» ءَ را گهترێں راه په ملک ءِ رکێنگ ءَ شه استێں مشکلاں لێک ات.

🔹دنیا ءِ نۆکێں جاورانَ نۆکێں سیاست ءُ کانود لۆٹ ایت

په سنی‌آنلاین ءِ سرهال ءَ مولانا عبدالحمید درائێنت: مرۆچی ماں دنیا ءَ نۆکێں جاور ودی بوتگ انت ءُ پهکێں مسائلاں بائد گۆں جاورانی بدل بیگ ءَ بدل به انت. کانود ءُ سیاستاں هم بائد نۆکێں جاورانی رد ءَ بدل به انت، پچےکه گوست ءِ کانوداں نه توان انت مردم ءُ ملک ءِ تیوگێں وازمندیانَ پێلو کن انت.

واجه ءَ گێش کرت: ملک ءِ چلءُپنچ سال پێسر ءِ کانود ءُ سیاستاں مشکل دار انت ءُ آوانی مشکلاں آزمود بوتگ انت، پمێشا آ کانود ءُ سیاستاں بائد بدل به انت.

🔹«نۆکێں بندشاں» ءُ «جنگ» ملک ءَ بیهار دے انت

زاهدان ءِ آدێنگ ءِ امام ءَ بندشانی ترندی ءِ باروا ڈاه دات ءُ گوشتء: قرار انت ترندێں بندش ملک ءِ سر ءَ بیار انت. «جنگ» ءِ بیهار هم هست. بندشاں که شه جنگ ءَ بدتر انت ملک ءَ بیهار دےانت.

واجه ءَ گوشت: گوست ءِ بندشاں هرچۆں که په لهتێنے سۆب داشتگ، بلێں په ایران ءِ لس مردماں ٹوهێں نقصان اش داشتگ. پێسر ءِ بندشاں ءُ فساد ءُ هولاں پهکێں چیزانَ شه استمان ءَ گپت. لهتے هم ملکی سۆب ءُ مڈیانَ دست ءَ گپتگ که اے چیز ءَ په ملک ءُ مردماں مشکل جۆڑ کرتگ.

🔹ملک ءِ مشکلانی جۆڑ کنگ ءَ «نۆکێں رهبندے» پکار انت؛ «ترانکاری» گهترێں توجیل انت

مولانا عبدالحمید «ترانکاری» ءَ را گهترێں توجیل په ملک ءِ مشکلاں زانت ءُ گوشتء: ملک ءِ نونێں مشکلانی جۆڑ کنگ ءَ نۆکێں رهبندے پکار انت ءُ گهترێں راه «ترانکاری» انت.

واجه ءَ سک سۆگه کرت: اثرمندێں گپءُترانَ توانت شه بندشاں دێمداری کنت ءُ «جنگ» ءُ «بندشانَ» شه ملک ءِ سر ءَ دور کنت ءُ ملک ءَ شه نونێں مشکلاں رکێن ایت. البت اے ترانکاریاں بائد په دل ءُ گۆں پوره ئێں اختیاراں به انت.

🔹تران‌کنۆکێں پاٹیاں بائد «راستی» ءُ «پراهدلی» داشته به انت

زاهدان ءِ آدێنگ ءِ امام ءَ گێش کرت: ما هم وتی پاٹی که ایرانی انت ءُ هم آدگه پاٹیانَ که امریکایی، اروپایی یا دگه به انت، سۆگه کن اێں که «راستی» داشته به انت. هردو پاٹی بائد راستی، امانتداری ءُ پراهدلی داشته به انت تاں ملک گێشترێں رنج ءُ مشکلانی آماچ مه بیت.

واجه ءَ درائێنت: اسلام ءِ حکم انت که ما گۆں وتی دشمنان هم راست به اێں؛ حتا اگه آواں راست مه به انت، ما راست به اێں ءُ وتی گپاں گۆں گواچن ءُ راستی ءَ گوش اێں.

🔹ایران ءِ مردماں معیشت ءِ پڑا «پێشا نبوتگێں رنجانی» آماچ انت/ تاں وهدے که مردمانی مشکلاں رندگیری مه بنت، استمان ءِ وشنودی کٹگ نه بیت

مولانا عبدالحمید وتی هبرانی گڈسر ءَ گۆں اشاره به ایران ءِ مردمانی رۆزیگی مشکلاں گوشت: ارمان که ایران ءِ مردماں اے رۆچاں مالزانشت ءُ رۆزیگی پڑاں سکێں ءُ پێشا نبوتگێں مشکلانَ سگ انت که ماں هچ ملک ءِ شه دنیا ءِ ملکاں چۆشێں رنجے نه دیستگ اێں.

واجه ءَ گێش کرت: ملک ءِ زرّ ءِ ارزشت گوں تیزی ءَ کم بوھگ ءَ اِنت. اگاں اے جاور برجاہ بیت، گڑا مردم ءُ ملک ءِ سر ءَ باز گران‌ترێں تاوان رس ایت. پمێشا اے مشکلانی گیشءُگیوار ءَ زبرێں پکر کنگے لوٹ ایت، دانکه ملک ءِ کارمستراں مه توان انت استمان ءِ لۆٹ ءُ مشکلانَ پێلو کن انت، استمان ءِ وشنودی کٹگ نه بیت.