دالبندین راجی مُچی ریاست ءِ زوراکی نزام ءِ بگیری بلوچ راج ءِ یک گچینی اِنت

بلوچ یکجھتی کمیٹی ءِ سروک ڈاکٹر ماه‌‎رنگ بلوچ ءَ گْوشتگ که راجی مُچی ریاست ءِ زُلم ءُ زوراکیانی سر ءِ نزام ءِ بگیری بلوچ راج ءِ یک گچینی اِنت. بلوچ راجی مُچی سوبمندی بلوچ راج ءَ روت. بلوچ راج ھرچ لوگ ءَ چه مردماں بھر زرتگ راجی یکمشت ءُ یکجھتی ءِ یک بلاھیں مسالے ایر کتگ ءُ ریاست ءَ را اے تچکیں کلوه داتگ که بلوچ راج چُکچینی ءِ بگیری ءُ وتی راج ءِ رکینگ ھاتر ءَ یکجاه ءُ مھکم اِنت.

آئی ءَ گْوشتگ که من بلوچ راج ءَ چه گوشگ لوٹ آں که اے مئے جُھد ءِ بندات اِنت. مارا بلوچ چُکچینی ءُ وتی سرڈگار ءَ چه زُلم ءُ زوراکی ءِ گُڈی نشان ءَ کور کنگ ھاتر ءَ یک دْراجکشیں ءُ مھکم ءُ سبرداریں جُھدے ءِ پکار اِنت.

ماه‌رنگ بلوچ ءَ گْوشتگ که ھمے بلوچ لانگ مارچ،  گوادر راجی مُچی ءُ دالبندین راجی مُچی ءَ بلوچ ءَ یکجاھی ءُ تپاکی ءِ مزنیں مسالے ایر کتگ بلوچ راج ءِ رُژنا ایں باندات ءِ ھاتر ءَ یک راھے گیشینتگ،  اگاں ما اے جُھد ءَ ھمے وڑ مھکمی دروشم ءَ یکمُشت ءُ یکجاھی ءِ گوم ءَ دیم ءَ به جُنز اِیت گُڑا منزل  مول ءُ مراد ءَ سر بیگ جھان ءِ ھچ وڑیں تاکت داشت کُت نه کنت.

آئی ءَ گْوشتگ دالبندین ءُ چاگی ءِ مھمان نوازیں ءُ دلیریں راج ءِ گوں دل جُھلانکی ءَ منتواراں،  آیاں دلیری ءُ پھکدلی ءَ جزبگانی ھمراھی ءَ بلوچ راجی مچی سوبمند کنگ وتی کرد پیلو کتگ اَنت.

بنشۆن: آشوب نیوز