بلوچانی ناکامی ءِ سوب

بلوچانی درمیان ءَ اگاں مڑاه ءُ میارجل هست ات، بلے نادانی هۆں باز ات. حسد ءُ کێنگ ءَ همێشه ماں دلاں جاه کتگ ات. یک دۆمیگ ءِ برداشت کت نه کت. بلوچانی درمیان ءَ یک خرابی ئے هست ات که سردار ءِ حکم ءُ فرمان ءَ ات انت. سردار سیاست ءُ آینده ءِ باروا بےخبر ات انت. بلوچ قوم همێشه تقسیم بیتگ انت، اتحاد ءُ وحدت بلوچانی درمیان ءَ نه بیتگ. پداں بلوچانی درمیان ءَ یک مزنێں بیماری ئے اے بیتگ که وتی برات ءِ شری ئے برداشت نه کتگ. بےآپ ءُ هشکێں زمین ءَ زندگی کنگ ءَ چه دماغ ء هۆں هشک بیتگ. پداں بلوچ قوم وتی سر ءِ زیادتیاں کدی برداشت نه کنت هروقت موقع رست وتی بدل ءَ گر ایت. تاریخ ءَ اگاں شری ءِ سر ءَ بچار ئے ترا مالوم بیت که راجپوت ءُ بلوچانی نفسیات عادت یک انت. اگاں سهی معنا ءَ شما بچار ات راجپوت ءُ بلوچ هزارانی سال گوستگ هزارانی تبدیلی قومانی درمیان ءَ آتکگ، بلے بلوچ ءُ راجپوت قوم انگت صدانی سال پُشت ءَ ینت.

هندوستان ءِ هرچ حکومتے که بیت راجپوتانی زهمانی ساهگ ءَ بیتگ. همے ڈۆل ءَ ایرانی حکومتانی هۆں کیخسرو ءَ چه بگر تا مغۆل شاهنشاهاں هۆں بلوچانی زهمانی ساهگ ءِ چێر ءَ بیتگ انت. بلوچانی ڈۆل ءَ راجپوت هۆں کسان کسانێں حاکمانی دست ءَ تقسیم بیتگ انت، طاقت ءِ تقسیم بیتگ. راجپوت ءُ بلوچ چه سیاست ءَ واقف نه بیتگ انت وت مان وتی دشمنی ءَ چه یک دست نه بیتگ انت. مسلمانانی حمله ءِ وهد ءَ هندوستان کسان کسانێں ریاستانی سر ءَ تقسیم ات، همے سبب ات که هدوستان ءِ قبضه گیران هندوستان ءَ قبضه کت. همے حال بلوچانی گت که خراسان، کرمان، مکران، سیستان ءَ کسان کسانێں حاکم ات انت که دز، ڈاکو، لنگ لُچّان تاریخی کردار ادا کت ءُ ملک ءِ قبضه کت انت. بلوچ قوم ءَ انگت چه تاریخ ءَ سبق حاصل نه کتگ، نشتگ ءُ بڈال جنت که: «پدرم نواب بود و سلطان بود»

بنشۆن: (بلوچ راج ءِ دپتر ءِ گارێں تاک)