اسرائیل غزہ ءُ لبنان ءِ سر ءَ اُرش کنگ ءَ میان‌استمانی کانوداں نادلگۆش کنت

شیخ‌الاسلام مولانا عبدالحمید، ماں زاهدان ءِ نمازجمعه ءِ دیوان ءَ (20 مهر 1403) گۆں سکێں شرگدرای شه اسرائیل ءَ په «جنێں ءُ زهگانی هۆرکشی» ءَ ءُ «مسیت ءُ نادراهجاهانی سر ءِ ارش» ءَ ماں غزه ءُ لبنان ءَ، اے کاران ءَ گۆں «دنیا ءِ رسم ءُ میان‌استمانی کانوداں چپ زانت» ءُ شه دنیا ءِ زۆراکاں لۆٹ ات که اسرائیل ءِ دێم ءَ گر انت.

🔹 نادراهجاه ءُ مسیتانی سر ءَ ارش کنگ هچ توجیه ءُ جوازے نه دار ایت

په سنی‌آنلاین ءِ سرهال ءَ مولانا عبدالحمید درشان کرت: ارمان که اے رۆچاں ماں غزه ءُ لبنان ءَ بےرحمێں ءُ بےدرورێں کُشتءُ کۆشے بوهگ ءَ انت. تیوگێں دین ءُ استمانانی مسیت ءُ کلیسا ءُ عبادتجاهانی سر ءَ ارش کنگ مردمانی چم ءَ بد ءُ رِڈ انت، بلے ارمان که اسرائیل اے بن‌گپ ءَ کمار نه کنت ءُ ماں غزه ءُ لبنان ءَ بازێں مسیت ءُ نادراهجاهان ءَ نشانگ جۆڑ ء کرتگ.

واجه ءَ تأکید کرت: نادراهجاهانی سر ءَ ارش کنگ که ٹپیان ءَ علاج کن انت، گۆں اے نیمون ءَ که جنگۆلاں اۆد ءَ چێر کپتگ انت، دنیا ءِ رسم ءُ میان‌استمانی کانودانی رد ءَ باز بد ءُ رڈ انت. سلاهبندانی چێر کپگ ماں نادراهجاهاں یا مسیتاں نه توانت جوازے بیت که اے جاگهانی سر ءَ ارش کنت.

واجه ءَ گوشت: بےسلاهانی کشگ گۆں دنیا ءِ رسم ءُ کانوداں چپ انت ءُ اسلام ءِ دین ءَ سک شه اے کار ءَ مکن کرتگ. هچ مسلمانے حق نه دار ایت که جنێن ءُ زهگ ءُ پیرێنان ءُ بےگناهێں نامسلمانان ءَ نشانگ جۆڑ کنت؛ اسلام ءَ چشێں جوازے مسلمانان ءَ نه داتگ. واجه رسول الله صلی‌الله‌علیه‌وسلم ءَ سۆگه کرتگ که ماں جنگاں سێل کن ات جنێں ءُ زهگاں ءُ پیرێنان ءَ مه جن ات ءُ مردمانی عبادتجاهانی سر ءَ ارش مه کن ات.

🔹 میان‌رۆدهت ءَ ٹوهێں جنگ ءِ خطر هست انت/ اے جێڑهانی یکێں راه فلسطین ءِ بن‌گپ ءِ عادلانه ئێں گێشءُگیوار انت

مولانا عبدالحمید وتی هبرانی دێمتر ءَ گوشت: بدبختی ءَ جاور انچۆش انت که ٹوهێں جنگے ءِ خطر که سرجمێں میان‌رۆدرهت ءَ ھوار به بیت، هست انت ءُ بدبختی ءَ کسے خێرلۆٹ ءُ دلسۆچێں مردمانی گپاں دلگوش نه کنت.

واجه ءَ گوشت: دلگۆش کن اێں که اگاں صدهزار یا یک ملیون مردم هم کشگ به انت انگت نونێں مشکلاں جۆڑ نه بنت، پچےکه اے جنگانی بنی سوب که فلسطین ءِ ٹگارانی زۆرێں گرگ انت، انگت هست انت ءُ تاں وهدے که اے ملگری گێشءُگیوار مه بیت اے جنگاں روان انت. گڑا گهترێں تۆجیل عادلانه ئێں سهل ءُ بن‌گپ ءِ منصفانه ئێں گێشءُگیواری انت. هر دو نێمگ ءِ مردم بائد انت گۆں وت نند انت په وتی حق ءَ وشنود به انت.

🔹 مردم حق دار انت شه شهرداری ءُ شهر ءِ شۆرجاه ءَ شرگداری کن انت

مولانا عبدالحمید ماں دگه بهرے شه وتی هبراں گوشت: زاهدان ءِ شهرداری ءِ بابت ءَ شرگداری هست. زاهدان ءِ نندۆکاں حق دار انت شه شهرداری ءُ شهر ءِ شۆرجاه ءَ شرگداری کن انت وهدےکه آوان وتی اگدهانی رد ءَ کردار مه کن انت.

واجه ءَ گێش کرت: شهر ءِ شۆرجاه که مردماں گچێن کرتگ ءُ همےرنگ شهرداری ءَ که مردمانی هزمت ءَ را منّتگ مردمانی وامدار انت. کسےکه مردمانی هزمت ءَ منّ ایت بائد په جانءُدل هزمت کنت ءُ کاهلی مه کنت.

🔹 زاهدان ءِ شهرداری شه لهتێں ادارهاں ٹوهێں وام لۆٹ ایت؛ گڑا پچے آوان وتی واماں نه دےانت؟!

زاهدان ءِ آدێنگ ءِ امام ءَ گوشت: هالانی رد ءَ زاهدان ءِ شهرداری شه لهتێں ادارهاں ٹوهێں وام لۆٹ ایت که سرجم ءَ چنکه هزار ملیارد به انت. اے ادارهاں پچے وتی وامان نه دےانت؟ پچے ماں زهدان ءَ کانود اێر دارگ نه بیت؟! وهدے شهرداری ءِ حق شه مردماں گرگ بیت پچے سرکاری ادارهاں که زر هم دار انت، شهرداری ءِ حق ءَ نه دےانت؟!

واجه ءَ گێش کرت: اگاں گۆں شهرداری ءَ همکاری مه بیت که آ په جوانی ءُ راستی وتی اگدهانی رد ءَ کرد کنت، گڑا تیوگێں مردماں نقصان گند انت. مئے لۆٹ شه کارمستراں همێش انت که راجی ءُ مذهبی پگر مه کن انت، بلکه گواچنان ءَ چار انت ءُ آمید ءِ رد ءَ کمک کن انت تاں آ ادارهاں وتی وامان ءَ به شهرداری ءَ ادا کن انت.

🔹 اۆگانستان ءِ سرکار جنێنانی وانگ ءُ زانگ ءِ واسته جاور ءَ جوڑ کنت

مولانا عبدالحمید وتی هبرانی گڈسر ءَ گوشت: جنێنانی وانگ ءُ دربرگ سک هژدری انت. مئے سۆگه په اۆگانستان ءِ کارمستراں همێش انت که جاور ءَ په آوانی وانگ ءُ زانگ ءَ جۆڑ کن کنت، پچےکه اگاں جنێناں په وانگ ءَ درملک ءَ برو انت گڑا آوانی دۆدءُربێدگ بدل بیت ءُ هر استمانے وتی دۆدءُربێدگ ءَ دۆست دار ایت ءُ اے دۆدءُربێدگ وهدے ساتگ بیت که آ وتی ملک ءِ ته ءَ بوان انت ءُ دربر انت. پمێشا وانگ ءُ زانگ ءِ جاور ءِ جۆڑ کنگ هر سرکارے اگده انت.