هر رهبندے استان ءِ چنڈچنڈ کنگ ءِ باروا گۆں مردم، زانتکار ءُ درێں پاگواجهانی دیدانکانی نادلگۆش کنگ ءَ بےسۆب انت

سعیدی چهبار ءِ مردمانی جهگیر ءَ ماں ایران ءِ پارلمان ءَ سےشمبی 25 اردیبهشت 1403 ءِ دیوان ءَ گوشت: هر وڑێں رهبندے استان ءِ چنڈچنڈ کنگ ءِ باروا گۆں مردم، زانتکار ءُ درێں پاگواجهانی دیدانکانی نادلگۆش کنگ ءَ بےسۆب انت.

سعیدی درشان کرت: هررنگێں جهدے که په بلوچستان ءِ شۆکێں نام ءِ کمرنگ کنگ ءَ بیت نابکشۆکێں ردی ئے؛ زاهدان ءُ سراوان ءُ خواش ءُ ایرانشهر ءُ چهبار پهکان یک بهرے شه بلوچستان ءِ درێں نام ءَ انت که هچبر شه آیی جتا نه به انت.

سعیدی گێش کرت: مۆکل دےات که مکران ءِ تیابدپ ءِ طرح ءُ رهبند په وخت ءُ گۆں کاربلدی ءَ پٹءُپۆل بیت نه که گۆں اشتاپ ءُ الگر ءَ بیت.