مخبر ءُ خائناں! همے زوتان انت که رسوا به ات

سراوان ءِ آدێنگ ءِ امام ءَ آ مردمان ءَ که په سرکاری سوت ءُ سۆبانی پار ءَ به وتی راج ءُ مذهب ءَ خیانت کن انت، سک پاترپ ءُ ڈاه دات.

مولوی حفیظ الله رئیسی ماں مسیت مدنی ءِ آدێنگ ءِ نماز ءِ دیوان ءَ مخبر ءُ خیانتکاران ءَ که ماں سرکاری دیواناں بهر زور انت، ڈاه دات ءُ گوشت ئِے: اَے خائن ءُ مخبراں! اگاں اے کرداران ءَ که ماں سرکاری دیواناں مولانا عبدالحمید ءِ خلاف ءَ گپ جن ات، ویل مه کن ات، ماں اے دنیا ءُ آدگه دنیا ءَ رسوا به ات.

اے بلوچێں پاگواجه ءَ آ مردمان ءَ که په وتی جند ءِ سوت ءُ سۆبانی پار ءَ سرکار ءِ سیاستان ءَ جار جن انت، گوشت: اے تریبون، پمپ بنزین، تراکتور، چاه ءُ کشار ءُ… اِنکس ارزشت نه دار انت که وتی راج ءُ استمانے خیانت ءَ کن ات.