آدێنگانی که پێشامد ءِ بۆ ءَ دے انت!

🔹گوستگێں تاک‌رێچ ءَ را زاهدانیاں گۆں هۆنێں_آدێنگ ءَ بنگێج کرت ءُ امبرانی ئێں تاک‌رێچ ءَ را گۆں آدێنگانی که هر هپتگ ءَ مسیت مکی ءُ مصلا بیڑو انت ءُ بازێں سلاه‌بند ءُ پهازۆکی واکے اۆدا مچ انت.

🔹چنکه وهد انت که آدێنگانی رۆچ ءَ زاهدان ءِ مردمانی تاهیر ءُ آوانی سمایی ءُ جانی امنیت گۆں سلاه‌بندێں واکانی بازێں مچی ءَ سک خراب انت. نون جاور وڑے بوتگ که پس ءُ ماساں تیوگێں هپتگ ءَ په آدێنگ ءَ گڑتیَ کن انت، حق دار انت، پچےکه بلوچانی نۆک ورنائێں نۆدربراں آدێنگانی رۆچ ءَ پد شه نماز ءَ بےاێشی که زهرشانی ئے کن انت تهنا پمێشا که خیام ءُ مدنی ءُ رازی ءِ دگانی تها چرّتگ انت، په بازی آوار جنگ ءُ لٹءُکٹَ بےانت. گۆں اے جاور ءَ هر پس ءُ ماسے حق دار ایت که پرێشان بیت.

🔹تاں نون بازێں خێرلۆٹێں واجه‌کارے که شه استان ءِ جاور ءَ سهی انت، سلاه‌بند ءُ پهازۆکی واکانَ رنگ رنگ ءَ گوشتگ اش که اے واکانی مچی گۆں وڑوڑێں موتور ءُ ماشیناں نه تهنا مشکلے را حل نه کنت، بلکه نۆکێں مشکل جۆڑ کن ات؛ بلێں چهرگ ءَ کارمستراں گور ءُ گۆشَ نه کن انت، پچےکه هر هپتگ ءَ واکانی کساس گێشتر بیت ءُ مردمانَ هم گێشترَ شۆرێن انت.

دێمترے جمعه ءَ نۆکێں تاکتیکے دێم ءَ گپت اش که مشکلانی گێشتر کرت. وهدےکه نماز هلاس بوت ءُ مردماں په گس ءَ رهدگ بوت انت، سلاه‌بندێں واکاں راهانی سر ءَ مچ بوت انت ءُ مردمانَ گوشت اش که شه کجا برو ات ءُ شه کجا مه رو ات ءُ همارنگ که گِندگَ بوت مردمان اش شۆرێنت.

🔹 ابید شه اێشی لهتێنے هم که آوانی هاسێں اۆگام ءُ چێرداتگێں دێماں نشانَ دات که لۆٹ اِت اش نمازوانۆکانی نام ءَ مسیت مکی ءُ دارالعلوم زاهدان ءِ اێشکءُآشک ءَ شِرّ گرم دےانت تاں واکانی دست ءَ نیمۆنے کپ ایت. یکے که په چم دیست ات گوشت ئِے: من گۆں مردماں همراه ات آں لهتێنے که سرءُ بوز اش بست ات اۆگام اش دات، وهدے که مدنی ءُ رازی ءِ چاراه ءَ رست انت گونڈێں زهگان اش گوشت که واکانی نێمگ ءَ سنگ جن انت، وهدےکه زهگاں سنگ جت، اے شت انت ءُ گۆں واکاں هوار بوت انت. واکاں هم که شه دێم ءَ په نیمونے گشت انت، تر ءُ هشک ءَ را سهت اش ءُ نمازوانۆکانی سر ءَ بێڑ اش کرت که دل اش شه غزه ءِ مظلومانی کشتار ءُ پونک ءِ نمازخانه ءِ بند کنگ ءُ اے واکانی دست ءَ په درد ات. آوان اول ءَ زردێں آپَکے را نمازوانۆکانی سر ءَ پاش ات ءُ گڑا بازێں مردمے را په زۆر ءُ گۆں لٹءُکٹ ءَ دزگر ءُ برت اش. ارمان که واکاں آ رۆچ ءَ تاں دیگر ءَ بلوچێں نۆدربر ءُ دکاندارانَ گۆں بےشرپی ءُ جهل‌جنی ءَ دزگر کرت. شه آ رۆچ ءَ پد تیوگێن هپتگ ءَ بندیگانی کهولاں که بےوس انت، سربُتَگ ءُ گَنگ سر ءَ وڑوڑێں ادارهاں شتگ انت بلێن بےآسر بوتگ. لهتے بےمیارێں بندیگاں که گۆں اۆتیش ءَ آزات بوت ات انت، گوشتگ بوت ات انت که دوارگ په نماز ءَ مسیت مکی ءَ مه رو انت حتا اگه مسیت ءِ همسایگ بےانت! دگه تهلێں پێشامدے که آ رۆچ ءَ کپت اێش ات که واکاں درکانودی ءُ په زۆر دارالعلوم زاهدان ءِ استادانی گسانی تها پتراِت اَت انت ءُ پد شه اے پدرێں حریمے پرۆشگ ءَ گسانَ پٹءُپۆل اش کرت ات.

🔹چۆ رۆچ ءَ رۆشن انت که کارمستر ءُ فرماندهانی رهبنداں پرے گوستگێں آدێنگاں که بازێں واکے را مچ اش کرتگ ءُ مسیت ءَ را بێڑو اش کرتگ تاں مردمانَ ترسێں انت که په مسیت مکی ءَ مه یا انت، ردێں رهبندے بوتگ، پچےکه آوان اے ڈیه ءِ مردمانی تب ءُ خو ءَ را نه زانتگ ءُ نه زان انت که اِدے مردم شه چشێں کارانَ نه ترس انت، بلکه اے کاراں زاهدان ءُ خواش ءُ دگه شهرانی مردمانَ گێشترَ شۆرێن انت.

🔹ٹوهترێں نیمون په مسیت مکی ءِ بیڑو ءُ دگه کاراں هما هاسێں اۆگام گوشگ بوتگ انت که لهتێنے که واجه ءِ سۆگه ئانَ دلگۆشَ نه کن انت ءُ لۆٹ انت شر گرم دےانت گۆں بستگێں سرءُبوز ءَ مردمانی میانجین ءَ اۆگامَ جن انت. بهمانگێں که پهازۆکی ءُ سلاه‌بندێں واکاں که آدێنگانی رۆچ ءَ ساڑی انت، اێشی بدل ءَ که شه آوان دێمگیری کن انت، بےمیارێں نمازوانۆک ءُ طالب ءُ نۆدربرانَ گۆں لٹءُکٹ ءَ دزگر کن انت ءُ درکانودی دارالعلوم زاهدان ءِ استادانی گسانی تها پتر انت.

🔹استان ءُ ملک ءِ سلاه‌بند ءُ پهازۆکی واکاں اگه پراستیَ لۆٹ انت که اے بن‌گپ هلاس بیت، گڑا زۆر ءُ بێهار ءُ دزگر کنگ ءِ بدل ءَ باید مردمانی لۆٹان دلگۆش کن انت، آ پکّا زان انت که مردمانی لۆٹ چےانت! آ باید سرپد بےانت که مردمانی دل په درد انت ءُ زۆر ءُ بیهار ءُ دزگر کنگ هچ مدامی ئێں آسرے نه دار ایت ءُ بیت کنت دگه تهلێں پێشامدے سبب بیت.

🔹 کارمستراں پکا زان انت که بازێے شه اے مردماں که دل اش په درد انت ءُ گێش شه یک سال انت که په آمید ءِ اێر دارگ ءَ ودار انت، په واجه شیخ الاسلام ءِ حرمت ءَ وتی دلان اش ساتتگ ءُ بےبرمش انت. بلێن ارمان که واکانی بازێں مچی مارشتانَ شۆرێن ایت ءُ بوز بستگێں مزوراں هم اے آچشے سر ءَ تێل رێچ انت تاں نیمونے بیت په مردمانی دزگر کنگ ءُ لٹءُشاپ ءَ.

🔹گڈی گپ اێش انت که گوستگێں تاک‌رێچ ءَ زاهدان ءِ هۆنێں جمعه ءَ را په مئے مردماں آدگار کرت ءُ امبرانی ئێں تاک‌رێچ هم گۆں کارمستر ءُ سلاه‌بندێں واکانی نازانتی ءُ شۆرێنۆکێں کرداراں بیت کنت که دگه تهلێں پێشامدے ءِ سبب بیت.