په اسرائیل ءِ رستری ئێں بێڑاں غزه ءِ سر ءَ هچ راست‌بندگِری ئێں منانکے نێست

شیخ‌الاسلام مولانا عبدالحمید، ماں زاهدان ءِ نماز جمعه ءِ دیوان ءَ (5 آبان 1402/ 27 اکتوبر 2023) اسرائیل ءِ بێڑان غزه ءِ سر ءَ ءُ آ شهرے بم گواری ءَ را دلبرێجۆک زانت ءُ شه امریکا ءُ اروپا ءُ تیوگێں ملکاں لۆٹ ات که شه اسرائیل ءِ هۆرکشی ماں غزه ءَ دێمداری کن انت.

په سنی آنلاین ءِ سرهال ءَ مولانا عبدالحمید گوشت: اے رۆچاں ماں فلسطین ءُ غزه ءَ جاور باز سک ءُ بےمٹ انت. شاید ما دێمتر ءَ اشکتگ که فلسطین ءُ غزه ءِ مردم بےمیار ءَ کشگ بوتگ ءُ آوانی سر ءَ بےرحمی بوتگ، بلێن فلسطین ءِ نونێن جاور باز سک انت که هچ کس آیرا سگت نه کنت.

واجه ءَ گێش کرت که مرۆچی نۆکترێن ءُ گندگ ترێں بمباں غزه ءِ مردمانی سر ءَ گوار انت که گێشتر جنێن ءُ زهگاں کشگَ بےانت ءُ غزه ءِ مردمانی مال ءُ مڑیانَ سچ انت. اے پێشامدانی سگگ په کسے که زرد ءِ واهند بیت ءُ کمے رحم دلے تهے بیت باز سک انت.

زاهدان ءِ آدێنگ ءِ امام ءَ درشان کرت: یکے شه اسرائیل ءِ کارمستراں گوشت ات که غزه ءِ مردم مجرم ءُ گناهکار انت. زاناں جنێن ءُ زهگاں هم گناهکار انت؟ کجام عقل منّ ایت که آ گناهکار بےانت؟! گێشتری مردمے که ماں غزه ءِ بمب گواریاں کشگَ بےانت بےگناهێں مردم انت. غزه ءِ شهیدانی کچءُکساس هپت هزار نپر ءَ رستگ که گێشتری زهگ ءُ جنێن ءُ پیرێن انت.

واجه ءَ ٹکاٹک گوشت: دنیا ءِ مردماں په بمب گواری ءُ غزه ءِ مردمانی سر ءِ رستری ئێں بیڑ ءَ هچ بےپۆکێں منانکے را نه من انت. اسرائیل ءِ فوج ءُ سیاستزانتاں نه توان انت پرے بێڑان راست‌بندگِری ئێں منانک بیار انت. اے بێڑاں هۆرکشی انت ءُ اسرائیل ءِ جندے چٹی ءَ انت، پچےکه مردماں زردے واهند انت ءُ وهدے اے چیزانَ گند انت گێش ءُ گیوار کن انت.

مولانا عبدالحمید گوشت: اروپایی ءُ امریکاییاں بائد اسرائیل ءِ دێم ءَ گر انت، پچےکه آوانی جندے باروا گوشگَ بیت که پچے شه اسرایئل ءَ دێمداری اش نه کرتگ که چشێن جنایت ئِے کرتگ. اگاں کسے چٹی ئے دیستگ نبائد وڑے کردار کنت که بےگناه ءُ زهگ ءُ مالانی سر ءَ رحم مه بیت؛ هچ کس ماں دنیا ءَ چشێن حقے نه دار ایت.

واجه ءَ سک سۆگه کرت: ما را امێت هست که میان‌استمانی گلاں ءُ اسلامی ملکاں په اے بێران کنۆکێں جنگے بند کنگ ءَ جهد کن انت. اے جنگ الله ءِ هژمے سببَ بیت، پچےکه بےمیارێں مردم کشگ بےانت.

🔹 حماس جنێن، زهگ ءُ پیرێں اسیران ءَ «بے هچ بئے ءَ» آزات کنت؛ اے کار راسدێم ءُ جوانێں برورد دار ایت

زاهدان ءِ آدێنگ ءِ امام ءَ دێمتر ءَ په حماس ءَ هم رهبندے پێش داشت ءُ گوشت ئِے: منی رهبند ءُ سۆگه په حماس ءَ اێش انت که اسرائیلی ئێں اسیراں که جنێن ءُ زهگ ءُ پیرێن انت، بے هچ بئے ئے آزات کنت؛ اے راسدێمێن برورد دار ایت ءُ خێرے سببَ بیت ءُ همےرنگ الله ءُ بازێنے شه دنیا ءِ مردمانی وشنودی ءِ سبب بیت.

🔹مردم ءُ پهازۆکی واکاں آزگ‌سمائێں جاور ءَ دلگۆش ءُ وت‌داری کن انت

مولانا عبدالحمید ماں دگه بهرے شه وتی هبراں ماں زاهدان ءِ آدێنگ ءِ نماز ءِ دیوان ءَ درائێنت: من گوستگێں آدێنگ ءَ سک سۆگه کرت که وتی تاهیر ءَ سات ات، بلێن ما سرپد اێں ءُ زبرَ زان اێں که دگه بدواه مردمانی میانجین ءَ پتر انت ءُ آوانَ شۆرێن انت تاں مشکل جۆڑ کن انت. پمێشا چشێن بدواهانی سار ءَ دار ات ءُ دلگۆش کن ات که آوان مشکل جۆڑ مه کن انت ءُ پد شه نماز ءَ گۆں الله ءِ ذکر ءَ په گساں برو ات.

واجه ءَ گێش کرت: مردم زان انت که آوانی حقاں رندگیری بوتگ ءُ انگت رندگیریَ بےانت. من مدام گوشتگ که مئے ٹوهترێں حقاں گۆں تیوگێں استمان ءِ حقاں یکےانت، پچےکه ما هم شه همے استمان ءَ اێں ءُ اگاں ملکی مشکلاں جۆڑ بےانت مئے مشکلاں هم جۆڑ بےانت. ملکی مشکلانی رندگیری شه راجی ءُ مذهبی مشکلاں دێمتر انت.

زاهدان ءِ آدێنگ ءِ امام ءَ گێش کرت: منی سۆگه به کارمستر ءُ پهازۆکی واکاں همێش انت که آزگ‌سمائێں جاور ءَ دلگۆش کن انت. ماں گوستگێں آدێنگ ءَ بازێں مردمے شه دگانی تها دزگر بوت انت که نمازوانۆک ات انت. ما را امێت هست که پهکێن بندیگاں، هاس سیاسی بندیگاں آزات بےانت. هردو نێمگ بائد پراهدلی ءُ دورچاری داشته بےانت تاں مشکلاں گێشتر ءُ بدتر مه بےانت.