دو نپر شه دارالعلوم زاهدان ءِ استاداں انگت بندیگ انت

سنی‌آنلاین| مولوی اکبر بیدل ءُ مولوی هدایت‌الله قنبرزهی، دو نپر شه دارالعلوم زاهدان ءِ استاداں که یک هپتگ دێمتر ءَ دزگر بوت ات انت، انگت بندیگ انت.

مولوی هدایت‌الله قنبرزهی، یکے شه دارالعلوم زاهدان ءِ استاداں گوستگێن پنچ شمبی ءَ (27 مهرماه 1402) ماں زاهدان ءِ رازی ءِ دگ ءَ شه پهازۆکی واکانی نێمگ ءَ دزگر بوت ءُ نامعلومێں جاهے برگ بوت ات.

مولوی اکبر بیدل، هم یکے شه دارالعلوم زاهدان ءِ استاداں پێسرے آدێنگ ءِ رۆچ ءَ پد شه نماز جمعه ءَ وهدے که سرکاری واکاں درکانودی ءَ دارالعلوم زاهدان ءِ اساتیدانی گسانی تها پتر ات انت، دزگر بوت ات.

یک هپتگ شه اے دو ورنائێں پاگواجه ئانی دزگر کنگ ءَ گوستگ، بلێن انگت آوانی بندیگ کنگ ءِ سبب معلوم نه انت، همےچیز ءَ آوانی لۆگمانانَ پرێشان کرتگ.