زاهدان ءِ هونێن جمعه ءِ نمازوانۆکانی شهیدکنۆکاں هر جاگه ءُ اگده ءِ که دار انت بائد سزا دیگ بےانت

سنی‌آنلاین| معین‌الدین سعیدی ماں پارلمان ءِ دیوان ءَ (چهارشنبه 23 آذرماه1401) گۆں انتقاد شه ذمه‌ماراں که مردمانی دردانَ نادلگۆشَ کن انت، په زاهدان ءِ هۆنێن جمعه ءِ نمازوانۆکانی شهیدکنۆکانی سزا دیگ ءَ سک سۆگه ئِے کرت.

چهبار ءِ جهگیر ءَ گوشت: الله ءِ نێکێن بندگ، عبدالواحد ریکی ءُ زاهدان ءِ بےمیارێن نمازوانۆکانی شهادت ءَ ایران ءِ استمان ءَ تسلیتَ گوش آں. امێتوار آں اے پێشامدانی کنۆکاں هر جاگه ءُ اگده ءِ که دار انت بائد سزا دیگ بےانت.

سعیدی آوانی باروا که استان ءِ مردمانَ «وت‌مستری لۆٹ» زان انت، گوشت: آوان که مردمانَ وت‌مستری لۆٹ گوشت یا  آ ذمه‌واراں که مردمانی دردانی باروا بےبرمش بوتگ انت، اێشرا زان انت که اے کرد اش ماں راجدپتر ءَ گار نه بیت. اسلام ءُ ایران، بلۆچ ءِ ناموس انت. بلۆچَ مر ایت بلێن شه وتی ناموس ءَ نه گوز ایت. ما ماں بلۆچستان ءَ نه وت‌مستری لۆٹ داشتگ ءُ نه دار اێں.