اے زهرشانی گۆں مردمانی کشگ ءَ بےتوار نه بیت

شیخ‌الاسلام مولانا عبدالحمید ماں زاهدا نءِ جمعه نماز ءِ دیوان ءَ (18 آذر 1401/ 9 دسمبر 2022) یکے شه زهرشانی کنۆکانی تیرکێل کنگ ءَ را شریعتے خلاف ءَ زانت ءُ گوشت ئِے: بژن ور آں شه محسن شکاری ءِ تیرکێل کنگ ءَ ماں تهران ءَ. وهدے آیی کسے را نکشتگ، بس راه ءَ‌ را بستگ ءُ یک حکومتی واکے را گۆں کارچ ءَ جتگ ئِے، آ واک هم ٹپی بوتگ، نه بائد کشگ بوتێن. اگاں کسے محارب هم بیت وهدے کسے را نه کشتگ ئِے بائد تهنا بندیگ بیت.

په سنی‌آنلاین ءِ سرهال ءَ مولانا عبدالحمید درشان کرت: اے شمے سستی ءُ نابودی انت که آ زهرشانی کنۆکانَ که مردم اش نه کشتگ تیرکێل کن ات، چشێن استدلالے شه قرآن ءَ رد انت. محاربه وڑوڑێن سزا دار ایت که بندیگ یا دراں‌ڈێه بیت. خدامرزی محسن شکاری آگاں جرمے کرت ات یک دو سال بندیگ بوتێں بس ات.

🔹پچے آ واکانَ که زهرشانی کنۆکانَ تیر کن انت سزا نه دےات؟

زاهدان ءِ جمعه ءِ امام ءَ شه حکومت ءِ دو رنگێں رفتار ءَ گۆں زهرشانی کنۆک ءُ سلاه‌بندێں واکاں گلگ کرت ءُ گوشت ئِے: ماں اے زهرشانیاں بازێنے تهنا په ناره ءِ سبب ءَ گۆں واکانی تیراں کشگ بوت انت. اے مردماں که ماں نمازجاه ءَ کشگ بوت انت مگه چۆن اش کرت ات؟ بلێن شما آ واکانَ قصاص نه کرت. اگاں ما دنیا ءِ کانودانَ وانشت نه کرتگ اێں،‌ بلێں ماں شرعی مسائلاں کاربلد اێں. شما پنچ نپر ءَ را پاهو ءِ حکم داتگ که تهنا یک واکے را کشتگ اش. وهدے په یک واکے ءِ کشگ ءَ چشێن کردے کن ات پچے زهرشانی کنۆکانی باروا چشَ نه کن ات؟!

🔹استمان ءِ کشگ جوانێں کارے نه انت

مولانا عبدالحمید گۆں اشاره به واجه رسول الله صلّی‌الله‌علیه‌وسلّم ءِ زندمانی ءَ درائێنت: دنیا ءِ حکومتاں بائد اے چیز ءَ زان ات که واجه رسول الله ءَ درائێنتگ: اگاں من بنڈانَ که ما را چَٹّی/ ضرر رسێن انت ءُ مئے دژمنانَ مدتَ کن انت، کُش آں گڑا مردمَ گوش انت محمد وتی استمان ءَ کش ایت، وهدے آ په وتی استمان ءَ وفا نه دار ایت، چطور په ما وفا کنت. دنیا زبر زانت که وتی استمان ءِ کشگ جوانێن کارے نه انت.

🔹جنێناں بائد ماں وڑوڑێن پڑاں وتی وس ءُ بودشت ءَ پدّر کن انت

مولانا عبدالحمید جنێنانی حقانی باروا گوشت: لهتێنے گوش انت شما جنێنانی آزاتی ءُ حقانی باروا گپ کن ات، بلێن شما وت چے کرتگ. دێرێن وهدے که ما اے چیز ءَ رندگیریَ کن اێں. بلوچستان سنتی ءُ ئێں ڈیه ئے بوتگ ءُ جنێناں آزاتی نه داشتگ، بلێن مرۆچی جنێنانی آزاتی ءِ باروا بازێن کارے بوتگ. پێسر ءَ جنێناں شه گچێنکاری ءَ زبهر ات انت، ما اے زبهری ءَ دور کرت. دارالعلوم زاهدان ءَ په زانتلۆٹێں جنکاں مفتێن وابجاه ءُ دوار جۆڑ کرتگ. ما لۆٹێں جنێناں فقیه ءُ مفسره بےانت یا مزن‌شهدربرجاه ءَ برو انت. ما پهکێن مسلمانانَ سۆگهَ کن اێں که شه جنێناں دێمداری مه کن انت تاں علم ءُ زانت کٹ انت ءُ وانندگ بےانت.