ماں اے ماهاں په وتی اصلاح، توفیق عبادت ءُ گوست ءِ جبران ءَ دعا کن اێں

مولانا عبدالغنی بدری، زاهدان ءِ جمعه ءِ ادارکێں امام ءَ ماں جمعه نماز ءِ دیوان ءَ (27 اسفند 1400) «شعبان ءُ رمضان» ءَ اصلاح ءِ ماه زانت ءُ سۆکه ئِے کرت که په وتی اصلاح ءُ وتی دل ءِ اصلاح ءَ جهد کن ات ءُ په توفیق ماں عبادت ءَ دعا کن ات.

په سنی آنلاین ءِ سرهال ءَ مولانا بدری درشان کرت: شعبان ءُ رمضان طاعت ءُ بندگی ءُ اصلاح ءِ ماه انت. مئے پاگواجهاں ماں اے ماهاں حتا وتی علمی کاران هم اۆشتارێنتگ ءُ بس عبادت اش کرتگ. آوان که توفیق ءِ واهند انت ماں اے ماهاں ٹوهێں کار کن انت ءُ آوان که بےتوفیق انت بیت الله ءِ کِنِکّ ءَ هم شه عبادت ءَ زبهر انت، پمێشا باید مدام په توفیق ماں عبادت ءَ دعا ءُ جهد بیت.

مولانا بدری گێش کرت: هرچنکه شه خیرالقرون ءَ دور به اێں ءُ به قیامت ءَ نزینک به اێں، فتنه ءُ فساد ءُ جرم و گڑتی ءُ تکانسری گێش بےانت. هرچنکه راحتی ءُ وشی ءِ اسباب تیار بےانت هما کساس ءَ گڑتی ءُ مشکلاں باز بےانت. گۆں اێشی که دنیا گۆں برجمی ءُ انجمنانی جۆڑ کنگ ءَ لۆٹ ایت مشکلانَ کم کنت، بلێں مشکلاں مدام گێش بیان انت.

واجه بدری گوشت: اے فساد ءُ بیرانیانی سبب ءُ اے مشکلانی رۆتگ چےانت؟ راستی اێش انت که دنیا ءِ فساد ءِ سبب انسان ءِ جند انت. ارمان که مردماں مروچی وتی ظاهر ءَ دلگۆش کن انت، بلێں شه وتی دل ءَ بےترانگ انت، درحالےکه دل وختے اصلاح مه بیت ءُ به شرک ءُ کفر ءُ خرافاتانی نێمگ برئوت گڑا رستری ئێں تب ماں زندگی ءَ ودی بیت ءُ بدن ءِ آدگه اعضا هم فاسد بےانت، بلێں وختے دل اصلاح بیت ءُ دل ءِ تها الله ءِ ترس ءُ یقین بَێت، آ مردم وتی جان ءُ مال ءَ هم په الله ءُ آیی رسول ءِ وشنودی ءَ دنت.

آیی گوشت: دل باز مهم انت، پچےکه دل ایمان ءُ قرآن ءِ جاگه انت، الله پاک دل ءَ دلگۆش کنت ءُ سجهێں پیغمبراں په دل ءِ اصلاح ءَ جهد کرتگ، پمێشا پیامبر صلّی‌الله‌علیه‌وسلم ءَ سیزده سال ماں مکه ءَ په دل ءِ اصلاح ءَ جهد کرت.

زاهدان ءِ جمعه ءِ ادارکێں امام ءَ گوشت: الله پاک گۆں نفس ءَ که آیی بنجاه دل انت، انسان ءَ آزمودَ کنت، پمێشا ماں انسان ءَ دو غریزه ءُ تب جۆڑِ کرتگ؛ یکے مَیل ءُ لۆٹ په گناه ءُ فسق شهوت ءُ ظلم ءَ ءُ آدگه میل په ایمان ءُ خدا ءُ تقوا ءُ نێکی ءَ. ماں انسان ءَ اے توان هست که بدی ءِ نێمگ ءَ بروت یا نێکی ءِ نێمگ ءَ.

دارالعلوم زاهدان ءِ تفسیر ءِ استاد ءَ درشان کرت: الله پاک ءَ په دلانی تزکیه ءُ مردمانی پاکی ءَ کتاب ءُ رهشۆن دێم داتگ. واجه رسول الله صلّی‌الله‌علیه‌وسلم ءُ قرآن ٹوهترێں رهشۆن ءُ کتاب انت په انسان ءِ تزکیه ءُ اصلاح ءَ. الله ءِ پاکێں کتاب ءِ تلاوت ءُ آیی کلوهانی سرپد بیگ، رۆچگ ءِ ماه، زکات ءُ الله ءِ پهکێں حکماں، په دل ءِ تزکیه ءُ اصلاح ءَ انت.

دارالعلوم زاهدان ءِ آموزشی معاون ءَ گوشت: ما گۆں اے احکاماں ءُ پهکێں مسائلاں آزمودَ به اێں، اگاں گۆں خداترسی ءُ الله ءِ حکمانی سر ءَ عمل کنگ ءُ دل ءِ لۆٹانی یله دیگ ءَ نفس ءَ پرۆش دےاێں، گڑا الله ءِ وشنودی ءُ گلباگ ءُ سۆبمندی ءَ کٹ اێں. بیا اێں ماں اے اصلاح ءِ ماهاں وت ءَ اصلاح کن اێں، نفس ءَ ناراض کن اێں ءُ الله ءَ وشنود کن اێں.