بازێں پاهوئاں قرآن ءُ سنت ءِ اعتدال ءِ رد ءَ نه انت

سنی‌آنلاین| شیخ‌الاسلام مولانا عبدالحمید ماں نیکشهر ءِ جمعه نماز ءِ دیوان ءَ (27 اسفندماه 1400/ 18 مارچ 2022) بازێں پاهو دیگ ءِ را ماں یک اسلامی ملکے سکّ اێر جت ءُ گوشت ئِے اسلامی ملکانی سرۆکانَ په عدالتے کمار ءُ پدگیری شه واجه رسول الله صلّی‌الله‌علیه‌وسلم ءِ رهبند ءُ مهر ءَ سۆگه ئِے کرت.

په سنی آنلاین ءِ سرهال ءَ مولانا عبدالحمید درشان کرت: ارمان که ماں یک اسلامی ملک ءِ یک رۆچے تها 81 نپر پاهو دیگ بوت انت که اے باز بےرحمێں کردارے.

واجه ءَ گوشت: بازێں پاهوئاں ماں هر ملک ءِ که بیت قرآن ءُ سنت ءِ اعتدال ءِ رد ءَ نه انت ءُ شه اسلامی رهبند ءُ مهراں دور انت. مگه جائے که قصاص ءِ حکم بیت.

مولانا عبدالحمید ٹکاٹک گوشت: مسلماناں ءُ اسلامی ملکاں باید ماں قرآن ءُ واجه رسول الله صلّی‌الله‌علیه‌وسلم ءِ راها گامجن بےانت، کتاب ءُ سنت ءَ په برابری ءُ اعتدال ءَ سۆگه کرتگ. اسلام مدارا ءُ درگوز کنگ ءُ گۆں سهل ءَ زندگی کنگ ءِ دین انت.

دارالعلوم زاهدان ءِ سرمستر ءَ چنکه درور شه واجه رسول الله ءُ آیی اصحابانی کرداراں گۆں مخالفاں بیان کرت ءُ گوشت ئِے: واجه رسول الله صلّی‌الله‌علیه‌وسلم ءَ ماں بدر ءِ جنگ ءَ تیوگێں هپتاد اسیر ءَ را آزات کرت ءُ یک نپرے را شه آوانی نه کشت. ماں مکه ءِ فتح ءَ هم مکه ءِ مردمانَ که سالاں گۆں اسلام ءَ دشمنی اش کرت ات، جار ئِے جت: «إذهبوا أنتم الطلقاء»؛ برو ات، شما آزات ات. خلفای راشدینانی زمانگ ءَ هم پاهو باز کم بوتگ ءُ تهنا قصاص بوتگ. مهتر علی رضی‌الله‌عنه هم هچ یکے شه خوارجانی اسیران پاهو نه دات.

مولانا عبدالحمید درشان کرت: اسلامی دین گۆں درگوز کنگ ءُ واجه پیامبر ءُ صحابه ءُ اهل‌بیتانی وش تبی ءَ ماں دنیا ءَ تالان بوت، پرے واست ءَ باید انت که اسلامی ملکانی سرۆکاں واجه پیامبر ءُ صحابه ءُ اهل‌بیتانی مهر ءُ رأفت ءَ وتی مخالفانی بارو ءَ دێم ءَ گر انت ءُ شه بازێں پاهوئاں دست زور انت.

زاهدان ءِ جمعه ءِ امام ءَ گوشت: مسلمانان هما وهد ءَ به سربرزی ءُ عزت ءَ رس انت که شه واجه  رسول الله صلّی‌الله‌علیه‌وسلم ءِ سیرت ءَ پدگیری کن انت ءُ ماں قرآن ءُ سنت ءُ صحابه ءُ اهل‌بیتانی راها گامجن بےانت. پهکێں مسلماناں هر مذهب ءِ واهند بےانت باید قرآن ءُ سنت ءِ رد ءَ کرد کن انت ءُ گۆں وت جنگ مه کن انت، بلکه وتی هوارێں چیزان دلگۆش کن انت.