مولانا عبدالرحمان محبی، دارالعلوم زاهدانءِ زبردستێن استادءُ یکءِ شه اێرانءِ نامءُتواری‌ئین پاگواجهان اے کوڈهیں دنیاءَ یله کرت

شیخ‌الحدیث مولانا عبدالرحمان محبی، دارالعلوم زاهدانءِ حدیثءِ زبردستێن استادءُ یکءِ شه اێرانءِ نامءُتواری‌ئین پاگواجهان، مرۆچی چارشمبیءِ پێشینءَ (۲۰ مرداد ۱۴۰۰)‌‌ ماں زاهدانءَ وفات کرت.
په سنی‌آنلاینءِ سرهالا، مولانا عبدالرحمان محبی پد شه اێشی که بازێن وختءِ گۆں ناجۆڑیءَ آماچ بوت ات ماں ٨۰ سالگیءَ بێران بوت.

◻️مولانا عبدالرحمان محبی ماں سال ۱۳۲۰ شمسیءَ ماں سراوانءِ «کلگان» هلکءَ ودی بوت. آ واجهءَ بنداتی درسانءَ همۆدءَ بنگێج کرت، گڑا وهدءِکه انگت ۱۲ یا ۱۳ سالِ نه بوت ات، په علمءِ کٹگءَ پاکستانءَ شت. ائولی‌سرا چنکه سال ماں
بلوچستانءِ «پنجگور»ءَ سبکِ ونت، پدا په کراچی ءُ گڑا به «تندوالله‌یار» ماں سندءِ ایالتءَ شت.

◻️مولانا محبی رحمه‌الله ماں پاکستانءِ
وڑ وڑێن وانگجاهان شه زبردستێن پاگواجهان چۆ: مولانا غلام‌الله‌خان، مولانا محمد‌یوسف بنوری، مولانا عبدالغنی جاجروی، مولانا عبدالله درخواستی ءُ مولانا موسی‌خان بازی رحمهم‌الله علم ءُ زانت کٹ ات ءُ گۆں مولانا حمادالله هالیجوی شه سندِ ایالتءِ پاگواجهان اصلاحی‌ئین رهوت گپت.

◻️شیخ‌الحدیث مولانا عبدالرحمان محبی ماں سال ۱۳۴۲ شمسیءَ په ملکءَ برگشت ءُ ماں سیستان‌وبلوچستانءِ وڑ وڑێن ڈیهان چۆ سراوان، گُشت، ایرانشهر و زاهدانءَ نزینک به چل سال گۆں دینی ۆ اصلاحی‌ئین جهدان گلائێش بوت. آ خدا بیامرز ماں دینی ءُ سرکاری وانگجاهان استاد بوتگ.

◻️ همےپێم مولانا محبی رحمه‌الله بازێن سالءِ ماں زاهدانءِ بلۆچی وتگوشءَ نێکراهی پرۆگرام داشتگ چۆ قرآن مجیدءِ تفسیر ءُ مردمان دینی سۆجءُ جستانِ پسه.

◻️شیخ‌الحدیث مولانا عبدالرحمان محبی گۆں مولانا عبدالعزیز رحمه‌اللهءِ لۆٹءَ زاهدانءَ آت ءُ بازێن سالءِ «صحیح‌ بخاری»ءِ دۆمی بهرءَ ماں دارالعلوم زاهدانءَ سبکِّ دات که هزاران طالبءَ شه اێرانءَ ءُ درے ملکان شه آ واجهءَ علم ءُ زانت کٹ اِت.

اللَّهُمَّ اغْفِرْ لَهُ وَارْحَمْهُ وَعَافِهِ وَاعْفُ عَنْهُ وَأَكْرِمْ نُزُلَهُ… اللَّهُمَّ لَا تَحرِمنَا أجرَهُ، وَلا تَفتِنّا بَعدَهُ.