پہ بیت اللہ الحرامءِ حجاجاں تقوا گھتریں توشگ انت

شیخ الاسلام مولانا عبدالحمیدءَ 28تیر1398ءِ جمعہءِ نمازءَ مراگشءَ : حجاجانی پہ یک گور بیگءُ حجءُ اے روچانی پہ جوانی گوزینگءِ پنت دیگءَ ھور تقوا ءُ پھریزگاری گھتریں توشگ پہ حجاجاں گوشت.

چہ زاھدانءِ اھل سنتءِ پیشنمازءِ دفترءِ ھال رسانی سایتءِ ھالءَ، مولانا عبدالحمیدءَ اے مراگشءِ تھا ، حجاج پہ تقواءُ حجءِ نیمگءَ یک گُوَربیگءُ دعاءِ پنت دات انتءُ گوشتی:
مسترینءُ گھتریں توشگ پہ حجاجاں تقوا انت؛ اللہ تعالی فرماین ایت: «وَ تَزَوَّدُوا فَإِنَّ خَيْرَ الزَّادِ التَّقْوي‏ وَ اتَّقُونِ يا أُولِي الْأَلْبابِ» (بقره: 197) تقوا بزاں پھریز چہ دراھیں گناہءُ منکریں کاراں. حج وھدءَ جنین ءُ مردین احرام بند انت ءُ قران ءِ دستورءِ ردءَ دیم اش پدر انت، مئے پنت پہ حجاجاں ھمش انت اے راہءِ تھا وتی دراھیں اعضایاں خاص چم ءُ گوشءُ زبانءَ بہ پہریز انت. کوسشت بہ کن انت کہ وتی ضرورتءِ ساماناں گوں وت بہ زیر انت ءُ چہ دگراں سامان پچ مہ گر انت.
واجہءَ گوشت: حجاج جھد بہ کن انت ھیالءَ یک گُوَر بہ کن انت؛ دگہ کارءُ بارءُ مپتیں گندءُ نند آں ویل بہ کن انت دراھیں کاراں اللہءِ حوالہءَ بہ دینت.
زاھدانءِ پیشنمازءَ گپ دیمترءَ برت:
حاجی مردگانی دابءَ انت کہ کفن گورءَ کن انت؛ انچش کہ گڈی کلمہ «أشهد أن لا إله إلا الله و أشهد أن محمد رسول‌الله» انت کہ گوش انت ءُ اللہ ءِ نیمءَ رو انت حاجی ھاں تلبیہ گوشانءَ (کہ اللہءِ یکی ءِ بیان کنگ انت) اللہءِ راہءَ رو انت.
واجہءَ گوشت: اللہ تعالی حجءَ درستاں برابر کنتءُ کار ایت؛ درست نہ دوتکگیں پچءُ چمپل (سرپایی) پوش انت. سر درءُ پاد شپادءَ کاینت. حج یک مزنیں کردے. امیت انت کہ اللہ تعالی امبریگیں حجءَ وتی بارگاہءَ قبول بہ کنت ءُ اے حجءَ پہ دنیاءِ مسلمانانی مشکلءُ ناگیگیانی رکگءِ سوَب بہ کنت.
واجہ مولانا عبدالحمیدءَ گپانی گڈی بندءِ تھا حجاج پہ دعاءَ کڈّن کت انت ءُ گوشتی: منی پنت پہ حجاجاں ھمش انت کہ پہ استان، کشور، جھان اسلامءُ سرجمین دنیاءِ مردماں دعا بہ کن انت .
سیستانءُ بلوچستانءِ حجاج خاص پہ ایے استانءَ دعا بہ کن انت کہ اللہ تعالی اے استانءَ آباد بہ کنتءُ چہ آفتءُ گزنداں بہ پھریز ایتی.