واجہ مولانا عبدالحمیدا ایران و اے دگہ اسلامی ملک پہ چینِ مسلمانانی کمکا توار پر داتنت

شیخ‌الاسلام مولانا عبدالحمیدا وتی اے جمعۂ (21 تیر 1398) گپانی تھا، چہ چینِ حکومتِ ظلم و زوراکیا پہ اے ملکِ مسلمانانی سرا پہ ترندی گلگ کرت و اے کارے چہ قرون‌وسطایی کاراں زانت.
واجہ مولانا عبدالحمیدا چہ ایران و اے دگہ اسلامی ملکاں لوٹت کہ یک توارا چینِ جنایتاں ایرجننت و محکوم کننت.
پہ سنی‌آنلائنِ ھالا، واجہ مولانا عبدالحمیدا وتی گپانی تها گوشت: چینِ حکومت مہ اے ملکِ سین‌کیانگِ استانا کہ مسلمانانی جاگاہ اِنت، بےرحمین و ترسناکیں ظلم آیانی حقا کنت.
واجھا دیما درّائینت: چینِ گوں ظلم و آزارے کہ مسلمانان دات و آیاں چہ نماز و روچگا مکن کنت، ھالانی تھا آتکگ کہ مسلمانانی گونڈیں زھگاں ھں چہ پت و ماتاں پچ گریت و پہ آیانی دین و مذھبِ ٹگل دیگا وتی مرکزانی تھا بارت و داریت.
واجہ مولانا عبدالحمیدا چینِ حکومتِ اے کار ترند ایرجت و گوشتی: جاہ کئیت کہ چینی مسئول و دولتمرد گوں وتی صنعتی و مادی دیمرویا، اخلاقی و فرهنگی لحاظا باز پدا انت.
دارالعلوم زاھدانِ کارمسترا گوشت: چینی دولتمرد ھمے گمان کننت کہ انگت قرون‌وسطایی دورا زندگی کننت و دنیاءِ مردم چہ آیانی ظلم و جنایاتا کہ مسلمانانی سرا مرتکب بنت، سھیگ نبنت. مروچی دنیا چو یک میتگے انت کہ ھرجاہ یک پیشامدے پیش بیئت گرداں خبر بنت.
شیخ‌الاسلام مولانا عبدالحمیدا چہ اسلامی ملکانی بے سدّیا گلہ کرت و گوشتی: وھدے کہ دنیاءِ 22 ٹوھیں ملکا مہ وتی بیانیہ تھا چین محکوم کرتگ، گڑا اسلامی ملکانی سکوت و بے تواری سک بد و زشت اِنت.
واجھا گوشت: من چہ رئیس جمھور و ایرانِ اسلامی ملکا لوٹاں کہ چینِ حکومتا پہ مسلمانانی حق و حقوقِ چیر پاد کنگِ سببا محکوم بکننت و مسلمانانی ظلم و شکنجۂ ھلاس بیگا لوٹوک ببنت.
زاھدانِ جمعۂ پیشنمازا گوشت: چینا بازیں اسلامی ملکے تھا اقتصادی منافع ھست، ھمینچو کہ اگہ اسلامی ملک اے منافعِ دیما بگرنت، چین اقتصادی حسابا ٹوھیں پروشے وارت.
واجه مولانا عبدالحمیدا آخر سرا گوشت: خلیج‌فارسِ کرّ و گورِ ملک و پاکستان و افغانستان و اے دگہ اسلامی ملک باید ھوریگا چینِ جنایت و ظلمِ دیما بوشتنت و اعتراض کننت.