واجه عبدالله‌جان جمال‌الدینی بلوچی زبانءِ درپشوکیں اِستار اِیر نشت

بلوچی زبانءِ مزنیں زبان‌زانت و ادیب واجه عبدالله‌جان جمال‌الدینی، کوٹهءِ زانت‌دربرجاه/دانشگاهءِ بلوچی زبان و ادبءِ استادا، دوشنبهءِ شپ 28 شهریورا (همدپ گوں 18سپتمبر 2016) مَں وتی عمرءِ 94 سالیا کوڑهیں دنیا یَل دات.

په سنی‌آنلائنءِ هالکاریا نقل چه ملکی رسانکدراں، واجه جمال‌الدینی که بلوچ راجءِ مزنیں دوزواه و دلسوچ و بلوچی زبانءِ ٹوهیں زبان‌زانتے بوتگ، پرندوشی نمنتگ و مرچی روچا واجهءِ جنازهءِ نماز وانگ بوتگ.
واجه عبدالله‌جانا گیش چه صد کتاب نبشتگ و هزاراں نبشتاناکی بلوچ و بلوچستانءِ باروا چاپ و شنگ کرتگ. بازیں علمی پَدمنت و آثارے چه واجها پشکپتگ. واجها چه وتی عمرا نیم سدی/ قرن په علم و زانتءِ وانینگ و ادبی و لبزانکی جهدا گوازینتگ.
واجه جماالدینی ماں روتاک‌نبیسی و سیاستءِ پڑا هں وتی مٹ وت بوتگ. همے پیم واجه «سنگتءِ ماهتاک» و «اکیڈمی سنگت» ءِ کارمستر و رهدربر بوتگ.
بے شک واجهءِ رُکست په بلوچ راجا ٹوهیں تاوانے که آئی جاها کس گپت نکنت.
بلوچستانءِ ادیب و زبان‌زانتاں وتی دلپدردی چه عبدالله‌جانءِ نمیراں بیگا درشاں کرتگ و آئیءِ نمیراں بیگ یک مزنیں تاوانے زانتگ.
عبداللہ جانءِ جنازهءِ نماز مرچی سهب سَےشنبه ساهت یازدها نوشکیا وانگ بوت و همودا آرام گپت.

سنی‌آنلاینءِ هال‌رسانی وب‌تاکءِ باسک وتا را گَمانی شریدار زاننت و اِے مزنیں زانتکار و زبانزانتءِ رُکستا په بلوچ راجا خاصکار واجهءِ لوگی مردماں تسلیت گوشنت و چه پاکیں الله‌ئا په خدامرزیا بکشش و رحمت و په پُشپداں صبر و اوپارا لوٹوک اَنت.