نزّیک دو میلیون نفرا حجءِ اعمال تمام کرت و حاجی بوتنت

یک‌ میلیون و 862 هزار و 909 نفرا مَں اِے سالا (1437هـ.ق) حجءِ اعمال په آرامی و سلامتی ادا کرتنت.

په سنی‌آنلاینءِ هالکاریا نقل چه “الجزیره”، چه اِے سالءِ حاجیاں یک‌میلیون و 325 هزار و 372 نفر ڈن چه سعودیا په حجا یهتگنت. ودگه 537 هزار و 537 حاجی هں گیشتر سعودیءِ اقامت داتگیں مردم بوتگنت و اودءِ اصلی مردم نبوتگنت.
بلے چه ایران و سعودی عربءِ اختلاف و گِروکشّاں 64 هزار ایرانی که قرار اَت حجا برو اَنت، پش کپتنت.
توفیق بن فوزان الربیعه، سعودیءِ بهداشتءِ وزیرا گوشتگ که اِے سالءِ حجا هچ دابیں سِلّیں نادراهی نبوتگ و حجءِ روچاں حاجی دنگ و دوا کنگ بوتگنت.
همے پیم مَں اے سالءِ حجّا پیریں حاجیانی ڈوک پیسرا چنگ و آیانا دیگ بوتنت تا په شیطانءِ ڈوک جنگا فکرش راحت بیت و ڈوکءِ چنگا اینگر و آنگر مرو اَنت.
پیش چه حجا 716 هزار حاجی په مدینهءِ زیارتا شتگنت و 550 هزار حاجی رند چه حجا قرار اِنت دیم په مدینه‌یا رهادگ بنت.