امنیتی واک/نیرو عمومی‌جاه و جاده‌یاں تیرگواری مکننت

شیخ‌الاسلام مولانا عبدالحمیدا مَں عیدءِ نمازءِ گپاں (یکشنبه 22 شهریور 95) گوں اشاره په ایرانءِ امنیتی واکانی بازیں جهد و کوششاں په مردمانی هزمتا، گوشت: امنیتی واکانی تیرگواریءِ تاوان مَں جاده و عمومی‌جاهاں باز اِنت، باید چه اِشیا مکن کنگ بنت.
په زاهدانءِ جمعهءِ پیشنمازءِ هال‌رسانی وب‌تاکءِ هالا، واجها همے پیم مَں وتی عیدءِ گپاں په عیدفطر و عیدقربانءِ تعطیلاتءِ گیش‌کنگ، کار و دَنداءِ جوڑ کنگ مَں استانا و وحدت وتپاکیءِ باروا گپ کرت.
مولانا عبدالحمیدا مَں یک بهرے چه وتی گپاں، په امنیتی واکانی تیرگواریءِ تاوانا اشاره کرت و گوشتی: منی وصیت په امنیتی واکاں خاصکار آواں که په مواد مخدرءِ دیم‌گیری و امنیتءِ برجاه دارگا جهد کننت اِیشنت که مَں اصلی جاده و شهراں که رو و آ باز اِنت، تیرگواری مکننت. پچے که اِیشیا جانی تلفات و تاوان هست.
واجها دیما په عیدءِ شپءِ امنیتی واکانی تیرگواری په دارالعلوم زاهدانءِ یک استادے سرا اشاره کرت و گوشتی: ما اِے روچاں لهتے دلپدردیں هالت دیستگ که امنیتی واکی هں پریشاں کرتگنت. امنیتی واک برے برے راها بند اَنت و ماشینانی سرا تیر گواری کننت و تیر بےگناهیں مردمانا لگیت؛ گڑا باید شه تیرگواری ماں عمومی راه و جاده‌یاں پهریز کنگ بیت، بلکیں ماشین هں تیرکنگ مبنت، پچے که اِے امکان هست که شه دستا در بروت و جاده‌یا یکے کشگ بیت.
مولانا عبدالحمیدا گیش کرت اگه یک مجرمے بجهیت ، گهتر اِنت شه اِشی که یک بے گناهے کشگ بیت. باید فرمانده وتی دستءِچیرءِ مامورانا سرپد کننت که عمومی جاهاں تیرگواری مکننت.

وحدت و تپاکی پهکانی ضرورت اِنت
ایرانءِ اهل‌سنتءِ مزنیں واجها ماں دگه بهرے چه وتی گپاں په تپاکی و حدتءِ ضرورتا اشاره کرت و گوشتی: وحدت په پهکاں ضروری اِنت ما پهکاں باید وحدتءِ پدا ببئیں، پچے که قرآنا ما را یک امتے کرتگ و په وحدتا ما را شون داتگ. باید گرداں وحدتا رعایت کننت.
مولانا عبدالحمیدا وتی اپسوز چه اسلامی ملکانی جاور و هالاتا درشاں کرت و گوشتی: مرچی عراق، یمن و سوریا ئا انچیں هالت گندگ بیت که مردما چه وتی جاها سریننت، بمب بازار و مددرسانی کاروانانی سرا دور دیگ بنت. اِے مزن‌واک بے رحم اَنت. یورپ، امریکه و روس اِے تماماں بے رحم اَنت. اِیش تواننت مشکلاتا گیشّیننت، بلے وت اِے کارا نکننت. مذهب و قوم و راجانی در میانا اختلافش دور داتگ تا وتی کٹا کننت و زوراکیں اسرائیلءِ امنیتا برجاه دار اَنت.
واجها په مسلمانانی اِے هالتءِ درکپگا گوشت که ضروری اِنت مسلمان توبه کننت و اللهءِ نیمگا پچ ترّنت و په قرآن و پیگمبرا دیم کننت.

مالدار په کار و دنداءِ جوڑکنگا جهد کننت
دارالعلوم زاهدانءِ کارمسترا په کار و دنداءِ جوڑکنگ مَں ملکا تاکید کرت و گوشتی: منی وصیت په آیاں که مالش هست اِشنت که که په کار و دنداءِ جوڑ کنگا جهد کننت تا مردم دپے نان یور انت. الحمدلله! مئی ملک امن اِنت و مالدار و آیانی مال امنیتءِ تها اَنت و هیچ بیمے په آیاں نیست.

دوئیں عیدانی چُٹّی گیش کنگ ببیت
مولانا عبدالحمیدا همے پیم ماں وتی گپاں په عیدفطر و عیدقربانءِ چٹیءِ گیش کنگءِ لوٹ دات و درشانی کرت: مئی لوٹ شه تدبیر و امیتءِ دولتا همیش اِنت که په عید قربانا سَے روچ و په عید فطرا دو روچ چٹی بکنت، پچے که شرعی عید همے دوئین اَنت تا اِے دوئیں عیدانی شان برزتر بروت و دولت توانت اِشانی بدلا دگه چٹیاں کم بکنت.