په پارلمانءَ بهتریں جَهگیر گچیں کنگ به بنت

شیخ‌الاسلام مولانا عبدالحمیدءَ گوں اشاره په ایرانءِ مجلس و پارلمانءِ گچیں‌کاری/انتخاباتءِ نزیکّیءَ، چه مردمانی دزبندی کرت که په پارلمانءَ بهتریں جهگیر/نماینده‌یاں گچیں کن اَنت. هما که وحدت و تپاکیءِ پدءَ اَنت و تمامیں مردمانی هیالش گور اِنت.
زاهدانءِ جمعهءِ پیشنمازءَ ماں یک بهرے چه وتی جمعهءِ وعظاں (23 بهمن 1394)ءَ گوشت: انتخابات و گچیں‌کاری یک مزنیں امتحان و چکّاسے که ما پهکاں باید ماں اے پِڑ و میدانءَ حاضر بئیں.
واجهءَ گوشت: هرچنت که مئے تمنا همیش اَت که شورانگهباں گیشتر وتی دلءَ مزن بکنت و دگه بازیں مردمے صلاحیتءَ تائید بکنت تا که مردم بتوان اَنت چه بازیں نامزدے ردءَ بهتریں مردءَ گچین بکن اَنت. انگتءَ امیت هست که دگه لهتے تایید کنگ به بیت. ما کوشش بکنیں چه اے نامزدانی در میانءَ بهترینءَ گچیں بکنین و په پارلمان و مجلسءَ دیم دئیں.
زاهدانءِ جمعهءِ پیشنمازءَ گوشت: هما پیم که من پیسرءَ اے گپ کرتگ که کوشش کنیں گچیں‌کاری/انتخاباتءَ راجی و مذهبی مکنیں، پدءَ هں گوشاں باید نامزدانی صلاحیت و شایستگیءَ بچاریں و هما کسءَ اوٹ/رأی بدئیں که تمامیں مردمانی هیالی هست. باید ما هں چو دگه دیم‌کپتگیں راجاں په شایسته‌سالاری و بهترینءِ درچنگءَ جهد بکنیں.
واجه مولانا عبدالحمیدءَ تاکید کت: منی هیالءَ بهتریں جهگیر و نماینده په مجلس و پارلمانءَ هما اِنت که تمامیں مردمانی هیالی گوَر بیت. جهگیر باید باید دلیر، توانا و گوں دگراں هورتور به بیت. من استانءِ شیعه و سنیاں خاصکار زاهدانءِ مردماں توصیه کناں که په تپاکی و وحدتءِ دستءَ آرگ و دژمنانی اختلاف و جتاییءِ دیم‌گیریءَ وتی در میانءَ ائتلاف جوڑ بکن اَنت. باید چه شیعه و سنیانی در میانءَ دو نفر زرنگیں گچیں کنگ به بیت.
واجهءَ گوشت: منی توصیه په استانءِ تمامیں مردماں خصکار زاهدان و سیستانءِ مردماں همیش اِنت که هما نامزداں اوٹ/رأی بدینت که استانءِ مردماں گوں وت تپاک کن اَنت. و چه آیانی حق و حقوقءَ دیمپانی بکن اَنت. هما مردم گچیں کنگ به بنت که استانی کارمستراں په مردمءِ هزمتءَ کمک بکن اَنت.
دارالعلوم زاهدانءِ کارمسترءَ گوشت: نوکیں جاور و حالاتءَ که دژمن چه هر فرصتءَ په اختلاف و ناتپاکیءِ جوڑ کرتنءَ بهر زور اَنتٰ اگه مئے در میانءَ جتایی و فاصله مه بیت، گڑا دژمن هم نتوان اَنت وتءَ را جاه دینت. استان و ملکءِ مردمانی تپاکی امنیتءَ برجم داریت.
واجه مولانا عبدالحمیدءَ چه گچیں‌کاریءِ نامزداں لوٹ اِت وهدے که یک جماعتےءَ یکے په گچیں‌کاریءَ درچت شما اے دگه راضی بِت و اللهءِ شگرءَ گر اِت که اے بلاهیں کار و امانت چه شما گرگ بیت. آ که اے مزنیں کار په آئیءِ گردنءَ ایر کنگ بیت، باید په اللهءَ پناه ببارت و چه اللهءَ کمک بلوٹیت.
واجه مولانا عبدالحمیدءَ وتی گپانی گڈسرءَ چه بانک انصار بانک انصارءِ کارمستراں په اِے بانکءِ فقهی شعبهءِ افتتاح و بنگیج‌بیگءَماں زاهدانءَ منتواری کت و گوشتی: ماں اے شعبهءَ یک شیعه و یک سنی عالمی نند اَنت و اے بانکءِ تمامیں معامله و لین و دیناں چار اَنت تا که ربا و سوتی معامله‌اے پیش مئییت.
واجهءَ گوشت: مرچی اللهءِ شگرءَ گریں که مئے ملکءَ شرعی ودینی مسایلءِ هیالداری ماں بانکاں رواج کپتگ و پیش چه اشیءَ رسالتءِ بانکءَ جهدی بنگیج کرتگ . ما هر بانکءِ اے دابیں جهدءَ استقبال کنیں.