شورای نگبهان باید دوربچاریت و دلءَ پراه بکنت

شیخ‌الاسلام مولانا عبدالحمیدءَ په ایرانءِ پارلمانءِ نامزدانی رد کنگ چه شورای نگهبانءِ نیمگءَ اشاره کت و گوشتی اگه شورای نگهبانی گیشتر دورچاری بکنت و دلءَ پراه بکنت، اے کار گیشتر مردمانءَ په گجین‌کاری/انتخاباتءِ بهر زورگءَ تیار کنت.
زاهدانءِ جمعهءِ پیشنمازءَ ماں یک بهرے چه وتی جمعهءِ گپاں (2 بهمن 1394/ 11 ربیع‌الثانی 1437)ءَ چه پارلمانءِ نامزدانی رد کنگءَ گله کت و گوشتی: زانیں که ایرانءِ دژمن باز اَنت و لوٹ‌انت مردمانی در میانءَ جتایی و فاصله بیار اَنت، اینچو پارلمانءِ نامزدءَ رد کنگ ملکءِ سلاهءَ نه اِنت. شورای نگهبانءِ کارمستر باید ماں ملکءِ هالاتءَ بچار اَنت و گیشتر دورچاری بکن اَنت و وتی دلءَ پراه بکن اَنت چیں کارے مکن اَنت که دژمنانی سوت و پائدهءَ به بیت.
واجهءَ دیمءَ گوشت: ما گوشیں آیاں که لیاقتش هست، و ملک و انقلاب و نظامش قبول اِنت، باید اشانی صلاحیت تایید کنگ به بیت. مئے تمنا چه شورای نگبهانءَ همیش اِنت که دیمی دورءَ که بلکیں لهتے چه نامزدانی صلاحیت تایید کنگ به بیت گیشتر دورچاری بکن اَنت.
زاهدانءِ جمعهءِ پیشنمازءَ اصلاح‌طلبانی بازیں نامزدے رد بیگءَ گوشت: بازیں نامزدے چه اصلاح‌طلباں رد کنگ بوتگ اَنت، اِے شریں کارے نه اِنت امیت اِنت که دیمی دورءَ تایید کنگ به بنت. شورای نگهبانءِ دورچاری توانت مردمانءَ تپاک و همدل بکنت و په گچیں‌کاری/انتخاباتءَ بکشّیت و همے پیمءَ دژمناں ناامیت بکنت.
واجه مولانا عبدالحمیدءَ رد بوتگیں نامزد وصیت کت اَنت و گوشتی: آ که رد بوتگ اَنت و آیانی منّءَ په آیان ظلم بوتگ، باید وتی حقءَ چه قانونءِ طریقءَ بگر اَنت. قانونءِ رعایت و هیالداری په ما پهکاں مهم و ضروری اِنت.

ایرانءِ هسته‌ای توافق و تحریمانی زورگءَ دژمنانی برنامه پروشت اَنت
شیخ‌الاسلام مولانا عبدالحمیدءَ ماں دگه بهرے چه وتی گپاں په ایران هسته‌ای تحریمانی پروشگ و زورگءَ اشاره کت و گوشتی: تحریمانی زورگ په ایرانیاں مزنیں موفقیتے اَت. من چه وتی و مئے مردمانی نیمگءَ راجکماش و دَرملکی وزیرءَ چه اشی که اے سربلندی اش په ایرانیاں کٹ اِت، مبارکبات گوشاں.
واجهءَ گوشت: منی دلءَ ایرانءِ دیمی اقتصادءِ دَور و جاگاه ماں منطقهءَ روشن اِنت. اے موفقیت مئے ملکءِ رابطهءَ گوں دنیاءَ گیشتر کنت. مئے تمنا همیش اِنت که اسلامی ملکانی رابطه گوں وت خب به بیت. آ ملکاں که رابطه‌اش گوں وت سستگ، اپدا بیاینت وتی رابطهءَ وصل کن اَنت.
واجهءَ گڈسرا گوشت: مئے گپ همک وهدءَ همے بوتگ که جنگ و درگیریءَ هچ سودے نے. جگنے که مرچے میاں رودراتکءَ جاری اِنت گیر چه ضرر وزیان و تلفاتءَ هچ چیزی مان نیست. عراق، سوریاءِ بهتریں راه مذاکره و گفتمان اِنت.