بانُکانی بُرزیں جاگاه ماں اسلامءَ

اسلامءِ دین یک پوره و کاملیں دینے، چه اللهءِ نیمگءَ په حضرت محمد مصطفی صلی‌الله‌علیه‌وسلمءَ اِیرگیجگ بوتگ. اِے دینءِ تمامیں حکم و پرمان چه هما پاکیں اللهءِ نیمگءَ که انسانانی حکمت و مصلحتانی زانوک اِنت نازل بوتگ اَنت.
بے‌شک ماں اے آسمانی دینءَ جنین و بانکانی جاه باز برز، شان‌دار و مزن اِنت و اسلامءِ دینءَ یک خاصیں توجه و دلگوشے په بانکاں هست.
اگه ما اسلامءِ سرچمگ، بزاں پاکیں قرآن و پیغمبرءِ دُرّیں احادیثءَ بچاریں و ماں آیاں پٹ‌وپول بکنیں، گڑا ما را پدّر بیت که اسلامءِ تهءَ جنین و مردیں گوں وت برابر و همسر اَنت.
الله تعالی پرمائینیت: « يَا أَيُّهَا النَّاسُ اتَّقُواْ رَبَّكُمُ الَّذِي خَلَقَكُم مِّن نَّفْسٍ وَاحِدَةٍ وَخَلَقَ مِنْهَا زَوْجَهَا»؛ اے مردماں! چه وتی هما رودینوکءَ به ترس اِت که شماری چه یک نفْسے جوڑ کت و چه همائیءَ آئیءِ زالی جوڑ کت.
چه اِے آیتءَ زانگ بیت که جنین و مردینءِ اصل و بنیاد یک اِنت و هر دو گوں وت برابر اَنت.
اللهءَ جنیں جوڑ کتگ تا که مردینءِ کمک و مدت به بیت آئیءَ ماں زندگیءِ سکّی و سُوریاں همراهی بکنت. همے واستءَ اللهءَ گوشتگ: « وَمِنْ آيَاتِهِ أَنْ خَلَقَ لَكُم مِّنْ أَنفُسِكُمْ أَزْوَاجًا لِّتَسْكُنُوا إِلَيْهَا وَجَعَلَ بَيْنَكُم مَّوَدَّةً وَرَحْمَةً»‌؛ چه اللهءِ آیاتءَ یکے همیش اِنت که چه شمئے جندءَ په شما زال و بانُکی جوڑ کتگ تا که شما آیانی کرا آرام گر اِت و شمئے درمیانءَ دوستی و مهربانی ایر کتگ.
اسلامءِ حکمانی روشناییءَ زانگ بیت جنین ومردینءِ میانءَ هچ پرک و دگری یے نیست، هر دو گوں وت برابر اَنت، بلے اے زانگی اِنت که مردیں «لوگ‌واجه» و جنیں «لوگ‌بانک» اِنت، بزاں مردیں، اللهءَ لوگءِ مستر و کماش کتگ که جُکّ و جنیں چه آئیءَ پرمانبری بری بکن‌اَنت و هما پیم که رمگ بے‌شپانک/شوانگ نه بیت، همے پیمءَ چُکّ و جنیں هں بے مسترے نه بنت.
اللهءَ هریکے چه جنین و مردینءَ یک طاقت و زوری داتگ و هریکے په یک کارے پیم کتگ، همے واستءَ اللهءَ گوشتگ: «ولیس الذکر کالأنثی»؛ مردیں چو جنینءَ نه اِنت.
الله تعالیءَ مردینءَ یک خاصیں قدرت و زورے داتگ تا په وتی روزگارءِ گوازینگءَ ڈنءَ بروت و کاروبار بکنت و چک و جنینءِ روزیگءَ در بیاریت، جنیں اللهءَ نرم‌دلی و مهربانی، صبر و تحمبل داتگ تا که ماں لوگءَ به نندیت و مردینءِ پُشپدیءَ بکنت و زهگانءَ تعلیم و تربیت بدات.
بلے اے گپ سک دلگوش لوٹیت که جنیں اسلامءَ‌ هچبر چه علم وزانتءِ دربرگءَ مکن/منع نه کتگ اَنت، بلکیں په دینی یا دنیائی علم و زانتءِ دربرگءَ آ توان اَنت ماں دینی وانگجاه و دنیائی کالج‌ و زانشجاهاں برو اَنت، بلے باید وتی اسلامی حجاب و سترءِ هیالداریءَ بکن اَنت.
همے پیمءَ باید دلگوش به بیت که جنیں ماں زانشجاه و کالجاں هما علم و رشتهءَ بوانیت که په آئیءَ دردے بوارت. په اشیءَ باید پیش چه وتی علمی رشتهءِ گچیں کنگءَ گوں زانوگرے که په آئیءَ دل سوچیت مشوره بکنت.
مئے بانُک خاصکار کسانیں باید دلگوش کن اَنت که آیانی کاروبار ڈن چه لوگءَ په آیانیءِ لوگءِ کاراں خاصکار ماں زهگانی تربیت و رودینگءَ باز نقص کاریت. بلے اگه یک جنینے گوں لوگی کارانی کنگءَ توانت که ڈنءَ یک کارے بکنت اشیءَ هچ مشکلے نیست، بلے اسلامی راه و رهبندانی هیالداریءَ بکنت.