شیخ الاسلام مولانا عبدالحمید کاسفرِ حرمین شریفین نیک شگون ہے

اہل سنت زاہدان کے نائب خطیب مولانا عبدالغنی بدری نے زاہدان میں سترہ مارچ دوہزار سترہ کے خطبہ جمعہ میں ممتاز سنی عالم دین مولانا عبدالحمید کے دورہ ارض وحی اور حرمین شریفین میں حاضری کو نیک شگون قرار دیا۔
دارالعلوم زاہدان کے ناظم تعلیمات نے کہا: حضرت شیخ الاسلام مولانا عبدالحمید اور مولانا مفتی محمدقاسم قاسمی حفظہمااللہ رابطہ عالم اسلامی کی دعوت پر مکہ مکرمہ روانہ ہوچکے ہیں جہاں آپ ایک فقہی اجلاس میں شرکت کرکے عمرہ کی سعادت بھی حاصل کریں گے۔
انہوں نے ’اعلی حکام کی فراخدلی‘ پر ان کا شکریہ ادا کرتے ہوئے کہا: مناسب ہوگا اس سفر کے اسباب فراہم کرنے پر اعلی حکام کا شکریہ ادا کیا جائے۔ میں یقین سے کہتاہوں کہ شیخ الاسلام مولانا عبدالحمید جیسے افراد دنیا کے کسی بھی کونے میں جائیں، وہ ہمارے لیے امن اور اتحاد کے سفیر ہوں گے جو مسلمانوں کو ایک دوسرے سے قریب لائیں گے۔
مولانا عبدالغنی بدری نے امید ظاہر کی ایرانی اور سعودی حکام کی فراخدلی سے ایرانی مسلمانوں کے لیے حج اور عمرہ کا سلسلہ ماضی کی طرح شروع ہوجائے۔ اس حوالے سے ہم مولانا عبدالحمید کے حرمین شریفین میں حاضری کو نیک شگون سمجھتے ہیں۔
انہوں نے اپنے خطاب کے آخر میں ایران میں نئے سال کے آغاز پر بائے روڈ سفروں کی جانب اشارہ کرتے ہوئے کہا مسافرین ٹریفک قوانین کا احترام کریں اور دورانِ سفر عبادت و بندگی سے غافل نہ ہوں۔