افغانستان میں مسجد کے باہر خودکش حملے میں 14 افراد جاں بحق

افغانستان کے شہر بلخ میں مسجد کے باہر خودکش حملے کے نتیجے میں 14 افراد جاں بحق اور 28 زخمی ہوگئے ہیں۔
غیر ملکی خبررساں ادارے کے مطابق افغانستان کے شمالی صوبے مزار شریف کے شہر بلخ میں مسجد کے باہر خود کش دھماکا ہوا جس کے نتیجے میں 14 افراد جاں بحق اور 28 سے زائد زخمی ہوگئے۔ خبر ایجنسی کے مطابق حملے کے بعد ریسکیو اہلکاروں نے زخمیوں کو طبی امداد کے لیے اسپتال منتقل کیا جہاں کئی زخمیوں کی حالت تشویشناک ہے۔
صوبائی گورنر کے ترجمان منیر احمد فرہاد کا کہنا تھا کہ حملے کی ذمہ داری تاحال کسی گروپ کی جانب سے قبول نہیں کی گئی ہے۔
واضح رہے کہ گزشتہ 24 گھنٹوں میں افغانستان میں دوسرا خودکش حملہ ہے جب کہ گزشتہ روز بھی کابل میں مزار پر حملے میں 18 افراد جاں بحق ہوگئے تھے۔

ایکسپریس نیوز