قابض فوجیوں نے ایک فلسطینی دوشیزہ کو گولیاں مار کر شہید کردیا

فلسطین کے مقبوضہ مغربی کنارے کے شمالی شہر قلقیلیہ میں سوموار کو علی الصباح ایک 23 سالہ فلسطینی لڑکی رشا محمد احمد عویصی کو گولیاں مار کر شہید کردیا۔ شہید ہونے والی فلسطینی دوشیزہ پر یہودی فوجیوں پر چاقو سے حملے کا الزام عاید کیا گیا ہے۔
مرکزاطلاعات فلسطین کے مطابق مقامی فلسطینی ذرائع اور عینی شاہدین کاکہنا ہے کہ اسرائیلی فوجیوں نے رشا عویصی کو “الیاھو” گذرگاہ کے قریب اس وقت فائرنگ کا نشانہ بنایا جب وہ گذرگاہ سے گذرنے کی کوشش کررہی تھی۔ اسرائیلی فوجیوں کا دعویٰ ہے کہ انہوں نےفلسطینی لڑکی کو رکنے کا اشارہ کیا مگر اس نے اس کی تعمیل نہیں کی بلکہ گذرگاہ پر کھڑے فوجیوں کی طرف تیزی سے بڑھنے لگی، جس پر فوجیوں نے اسے گولی کا نشانہ بنایا۔
فلسطینی وزارت صحت نے بھی فلسطینی دو شیزہ رشا محمد احمد عویصی کی شہادت کی تصدیق کی ہے اور بتایا ہے کہ شہیدہ کی عمر 23 سال تھی۔
عبرانی ذرائع ابلاغ کے مطابق چیک پوسٹ پر کھڑے فوجیوں کی طرف بڑھنے والی ایک فلسطینی لڑکی کو اس وقت گولی ماری گئی جب اس نے اپنے پاس موجود ایک چاقو سے اسرائیلی فوجی پر حملے کی کوشش کی تاہم اس کے حملے سے قبل ہی گولیاں مارکر اسے شہید کردیا گیا۔
عبرانی ذرائع ابلاغ نے قبل ازیں یہ اطلاع دی تھی کہ قلقیلیہ میں فوجیوں پر چاقو سے حملے کی کوشش کرنے والی فلسطینی لڑکی کو گولی ماری گئی ہے جس کے نتیجے میں وہ شدید زخمی ہوگئی ہے۔ فلسطینی لڑکی کی شہادت کے بعد اسرائیلی فوج نے الیاھو گذرگاہ کو تمام اطراف سے بند کردیا تھا۔
خیال رہے کہ فلسطین کے مقبوضہ مغربی کنارے اور بیت المقدس میں اسرائیلی فوج کی ننگی جارحیت کے نتیجے میں پچھلے ڈیڑھ ماہ میں 80 فلسطینی جام شہادت نوش کرچکے ہیں۔ شہداء میں 18 بچے اور 4 خواتین بھی شامل ہیں۔

مرکزاطلاعات فلسطین