مولانا عبدالحمید نے شکارپور حملے کی مذمت کی

زاہدان(سنی آن لائن) ممتاز ایرانی سنی عالم دین مولانا عبدالحمید نے جمعہ تیس جنوری کو شکارپور میں شیعہ برادری پر حملے کی مذمت کرتے ہوئے متاثرین کے ساتھ ہمدردی کا اظہار کیا ہے۔
سنی آن لائن کے مطابق خطیب اہل سنت زاہدان نے سنیچر اکتیس جنوری میں بیان جاری کرتے ہوئے صوبہ سندھ کے شہر شکارپور میں شیعہ نمازیوں پر حملے کو ’المناک اور افسوسناک‘ قرار دیا ہے۔
اس واقعے پر افسوس کا اظہار کرتے ہوئے مولانا عبدالحمید نے کہاہے: اس طرح کے وحشیانہ اقدامات کے پیچھے انتہاپسند عناصر ہیں جو بلاشبہ اسلام کے دشمنوں کے مفادات کی راہ پر چلتے ہیں۔
مہتمم و شیخ الحدیث دارالعلوم زاہدان نے اپنے بیان کے آخر میں لکھاہے: موجودہ حساس حالات میں جب شیعہ وسنی برادریوں میں انتہاپسند لوگ موجود ہیں، دونوں فرقوں کے علما و دانشور اور عوام نشانہ بن رہے ہیں؛ اس سے مسلم فرقوں میں عداوت و دشمنی پیدا ہوتی ہے۔ بلاشبہ ایسے اقدامات سے عالمی سامراجی طاقتوں اور صہیونی تحریک کو فائدہ مل رہاہے۔