کردستان: سنندج کے سنی خطیب انتقال کرگئے

ایرانی صوبہ کردستان کے صدرمقام سنندج کے مرکزی خطیب و امام ’ماموستا حسام الدین مجتہدی‘ ہفتہ چھبیس اپریل کو تہران میں انتقال کرگئے، انا للہ وانا الیہ راجعون۔

سنی آن لائن نے ایرانی سرکاری خبررساں ادارہ، ایرنا، کے حوالے سے رپورٹ شائع کی ہے، ماموستا مجتہدی چودہ اپریل میں کم فشارخون اور پیٹ میں خون جمع ہونے پر اسپتال داخل کردیے گئے تھے۔ سنندج میں ان کی طبیعت بہتر ہوئی تھی لیکن علاج کی تکمیل کے لیے انہیں دارالحکومت تہران کے ایک اسپتال میں داخل کرایاگیا جہاں ان کا انتقال ہوگیا۔

رپورٹس کے مطابق انتقال سے قبل ان کے پیٹ میں آپریشن ہوا تھا۔

ماموستا حسام الدین مجتہدی دس سال قبل سنندج کے خطیب مقرر ہوئے جبکہ مارچ دوہزار گیارہ میں آپ ’مجلس خبرگان رہبری‘ کے رکن منتخب ہوگئے۔ انتقال کے موقع پر آپ کی عمر تقریبا 93 برس تھی۔

سنی آن لائن ٹیم مرحوم مجتہدی کے اہل خانہ، اعزہ واقارب اور کردستان کے اہل علم وعام لوگوں سے تعزیت کا اظہار کرتی ہے۔ اللہ تعالی انہیں مغفرت فرماکرجنت الفردوس میں مقام عطا فرمائے۔