شام میں پرتشدد واقعات میں مزید سات فلسطینی شہید

شام میں حکومت مخالف لڑائی کے دوران بدھ کے روز کم سے کم سات فلسطینی شہید ہوگئے۔

مرکز اطلاعات فلسطین کے مطابق “فلسطین۔ شام ایکشن گروپ” کی جانب سے جاری ایک بیان میں بتایا گیا ہے کہ شام میں تشدد کے مختلف واقعات میں گذشتہ روز کم سے کم سات فلسطینی پناہ گزین شہید ہوئے۔ ذرائع کے مطابق چھ فلسطینی شمالی شہر حلب میں  صدر بشارالاسد کی حامی فوجوں اور باغیوں کے درمیان ہونے والی خون ریز جھڑپوں میں مارے گئے جب کہ ایک فلسطینی کی شہادت دمشق کے جنوب میں یرموک پناہ گزین کیمپ میں ہوئی۔ یرموک کیمپ میں شہید ہونے والے فلسطینی پناہ گزین کی شناخت مصطفیٰ ابو ریہ کے نام سے ہوئی ہے۔
شام سے ملنے والی اطلاعات کے مطابق کل بدھ کو یرموک کیمپ میں عوامی محاذ کے مسلح جنگجوؤں اور کیمپ میں موجود ان کے مخالفین کے درمیان بھی جھڑپیں ہوئی ہیں، جن میں ایک شامی شہری کے مارے جانے کی خبریں ہیں۔ جب کہ متعدد افراد زخمی بھی ہوئے ہیں۔
عینی شاہدین کے مطابق یہ جھڑپیں کیمپ میں شاہراہ رامہ پر اس وقت ہوئیں جب سیکڑوں فلسطینی پناہ امدادی سامان کے حصول کے لیے وہاں جمع تھے۔
ادھر حلب میں لیرمون کے مقام پر باغیوں کے القدس بریگیڈ اور سرکاری فوج کے درمیان خون ریز لڑائی میں چھ فلسطینی اور متعدد شامی شہریوں کے مارے جانے کی اطلاعات ہیں۔ یہاں یہ امر بھی واضح رہے کہ القدس بریگیڈ میں فلسطینی جنگجو بھی شامل ہیں جو صدر بشارالاسد کے خلاف برسر جنگ ہیں۔
ادھراقوام متحدہ کی ریلیف ایجنسی برائے پناہ گزین “اونروا” نے دمشق کے قریب جرمانا کیمپ میں فلسطینی پناہ گزینوں کے اسکول آج جمعرات کو بھی بدستور بند رکھنے کا اعلان کیا ہے۔ ریلیف ایجنسی کا کہنا ہے کہ کیمپ میں امن وامان کی کیفیت نہایت نازک ہے اور موجودہ حالات میں اسکول نہیں کھولے جاسکتے ہیں۔

مرکز اطلاعات فلسطین